Одбележувајќи го 90-годишниот јубилеј од раѓањето на Ристо Калчевски (1933-1989), еден од најзначајните толкувачи на енформелната практика во македонската ликовна уметност, целта на изложбата е интегрално презентирање на неговото богато творештво. Јубилејната изложба ќе биде отворена на 21 декември, во 19.30 часот, во репрезентативниот објект Даут пашин амам.

– Досегашните истражувања и анализи кои ги сумираме на едно место, односно негово критичко и научно валоризирање како автор кој оставил свој специфичен белег во одредени општествени услови, упатуваат дека Ристо Калчевски зазема исклучително место во развојот и афирмацијата на македонската современа уметност, оставајќи посебен белег и преку долгогодишната педагошка дејност.

Дефинирајќи го како еден од најзначајните претставници на енформелот кај нас, појавата на Ристо Калчевски се случува токму во еден период особено значаен за македонската ликовна сцена, средината на 50те години од минатиот век, односно во услови кога слободата на уметничкото творештво станува незапирлив процес во осовременувањето на ликовниот израз. Тој ѝ припаѓа на генерацијата ликовни уметници образувани на некои од југословенските ликовни академии.

За првпат неговите дела биле изложени пред јавноста по дипломирањето во 1957 година, на една групна изложба во Прилеп. Критичката јавност овие дела ги дефинира како плод на синтетичкиот кубизам, во кои е евидентна „карактеристична скратена пиктурална еволуција“. Усогласените строги односи ги нагласуваат геометризирани линии кои ги обликуваат формите и плановите на предметите, елиминирајќи ја играта светло-сенка и валерските решенија – истакнуваат од Националната галерија.

Ристо Калчевски е роден на 29.04.1933 во Прилеп. Училиште за Применета уметност завршил во Скопје 1953 година. Дипломирал на Академијата за ликовни уметности во Љубљана 1957, во класата на Максим Седеј. Член на ДЛУМ е од 1958, а на групата „Мугри“ од 1960 година.

Работел како професор на Факултетот за ликовни уметности „Сули Ан“, Скопје од 1985 до 1989 година. Починал на 07.08.1989 во Скопје. Голем број на национални и меѓународни награди, самостојни и групни изложби се дел неговото богато уметничко портфолио.

Куратори на изложбата се Маја Неделкоска – Брзанова, кустос советник и Маја Чанкуловска – Михајловска, виш кустос. Изложбата во Даут пашин амам ќе трае до 29 февруари 2024 година.