Меѓународниот ден на културното наследство (спомениците и локалитетите) е востановен на 22-та седница на Генералната конференција на УНЕСКО во 1982 година. Од тогаш 18 април е ден на прославување и промоција на културното наследство и претставува можност за подигање на свеста за неговиот диверзитет, за неговата важност и повредливост, како и за потребата за неговата конзервација.

Националната галерија на Република Северна Македонија ќе се придружи кон одбележувањето на Меѓународниот ден на промоција на културното наследство и ќе ги отвори вратите за посетители во објектите Даут пашин амам, каде може да се види Постојаната поставка од 14-21 век; и Чифте амам, каде е поставен мултимедијалниот проект „Пејзажно искуство“, со кој Македонија беше претставена на уметничкото Биенале во Венеција во 2022 година. Во текот на целиот ден, 18 април 2023 (вторник), влезот за сите посетители е слободен во период од 10 до 18 часот.

Подигање на свеста за значењето и вредностите на културното наследство во Република Северна Македонија, како значајна превентивна активност, системска едукација и специјализација на кадар, користење експертски совети во доменот на третманот на културното наследство, ефектуирање на мониторинг мисијата за состојбата на културното наследство, како елемент на превентива, односно сегашна приоритетна активност во доменот на заштита на културното наследство, се едни од целите на Националната галерија.

Националната галерија е институција која одигра мошне значајна и историска улога во доменот на движното културно наследство, афирмирање на македонското ликовно творештво од средината на дваесеттиот век, па сѐ до денес.

Денес, основни дејности на Националната галерија се музејската и галериската дејност, а во нејзините објекти се одржуваат и голем број различни културни настани (концерти, промоции, советувања, дискусии и сл.).

Интензивната активност спроведена во текот на 75 години од постоењето на Галеријата очигледно докажува дека таа е една од најдобрите национални институции во уметничката област, чија постојана тенденција отсекогаш била и ќе биде потврда, афирмација и промоција на достигнувањата на македонска ликовна уметност во националните рамки, на Балканот и на меѓународно ниво.

Националната галерија на Македонија управува со четири објекти од кои два претставуваат споменици на културата, недвижно културно наследство, ретки примероци на исламската, профана архитектура, а тоа се Даут пашин амам и Чифте амам.

Движното културно наследство, кое брои над 4.000 музејски предмети/уметнички дела, управувано од Националната галерија е организирано во повеќе колекции.