Новоизбраниот член на Советот на јавни обвинители Фатих Алиу кој е поранешен документарист во Одделението за аналитика и документација и последно бил началник во Одделението за прекршоци Тетово денеска во Собранието даде свечена изјава откако на 24 јуни беше изгласан на седница на законодавниот дом, на предлог на собраниската Комисија за прашања на изборите и именувањата.

Изјавата за совесно, чесно и одговорно вршење на функцијата член во Советот на јавни обвинители и почитување на Уставот и законите, Алиу ја даде пред претседателот на Собранието Африм Гаши, во присуство на претседателката на Советот, Душица Димитриеска.

Според скромната биографија која ја доставил до Собранието, Фатих Алиу од тетовско Горно Седларце завршил Правен факултет во Скопје, а во 2007 година положил правосуден испит. Работниот век го поминал во СВР Тетово каде од 2002 година работел како приправник, а за брзо бил распореден на работно место документарист.

Од 2007 до денес е началник на Одделение за прекршоци во Тетово.

– Во текот на мојот работен век професионално, совесно и навремено сум ги обавувал сите работни задачи и должности кои ми се дадени и за кои сум бил должен да ги работам согласно Законот и другите подзаконски акти. Сум посетувал многу советувања, семинари, тркалезни маси како и советувања и семинари во Академијата за судии и јавни обвинители од сите области со посебен осврт на кривичното право. Поради тоа сметам дека сум покажал солидни резултати во досегашната моја работа и со моето досегашно работно искуство како правник ги исполнувал условите да бидат доследен член на Советот на јавните обвинители, со моето залагање во работата ќе придонесувам за успешно спроведување на реформите во правосудството во Р.С. Македонија – пишува предложениот член во биографијата.

Членовите на Комисијата за прашања на изборите и именувањата во понеделникот утврдија нова предлог-одлука за избор на член на Совет на ЈО и наместо претходниот предлог Ведат Салихи, дипломиран правник го предложија Алиу.

Документарист и началник за прекршоци од Тетово стана член на Советот на јавни обвинители