Началникот на Генералштабот на Израелските одбранбени сили (ИДФ), генерал-потполковник Ејал Замир, го одобри главниот концепт на претстојната голема воена офанзива насочена кон освојување на градот Газа, објави денес израелската армија.

Според ИДФ, главниот концепт на планот за напад врз Газа бил дискутиран денес за време на состанокот што Замир го одржал со Генералштабот, претставници на безбедносните служби Шин Бет и други офицери, објавува „Тајмс оф Израел“. Исто така, главниот концепт за следните чекори во Појасот Газа бил презентиран и одобрен во согласност со упатствата на политичкото раководство, кои биле издадени за офанзивата против Хамас во градот Газа, но почетокот на нападот сè уште не е закажан.

Претходно беше објавено дека Замир бил скептичен во врска со планот за освојување на градот и дека имал несогласувања со министерот за одбрана Израел Кац.