Светски познатиот хит „Незапирлива“ од австралиската кантавторка Сиа ечеше синоќа пред Офицерскиот дом во Битола на втората по ред ноќна женска трка „Биди своја“. Оваа спортска манифестација ги поттикна голем број на професионалки и рекреативни масовно да земат учество во трката.

Според организаторите, за петкилометарската атлетска трка имаше неверојатен одзив кај сите жени, мајки, баби, девојчиња коишто веруваат во себе.

-Ако лани на трката учествуваа 250 учеснички, годинава трчаа над 350 битолчанки. Вози го животот како трка со препреки и не застанувај. Силата и упорноста на жената не познава граници. Не се мери со бројката на годините, туку со моќта на волјата и младешкиот дух кој го носиш во себе. На трката, најмладата учесничка имаше 12 години, додека пак највозрасната беше на 77 годишна возраст. Целта на овој спортски настан е да ги мотивираме и да ги поттикнеме жените дека секоја од нив може да си постави своја цел и тоа да им стане реалност. Јас тргнувам од мојот живот, кога почнав да учествувам на трките низ Македонија, а претходно живеев во комфор зона, со самото учество на трките и минутажите, моите се се подобри и подобри. Со мојата борбеност на трките сфатив дека тоа може да биде така и во приватноста. Не само да живееме исто, туку дека треба да се менуваме. Да си дадеме мотив плус, бидејќи како жени и мајки обврските ни се големи, но, мора да си наоѓаме и време за себе-вели Маја Атанасовска организатор на ноќната женска трка „Биди своја“ што по вторпат се одржа во Битола.

Таа на жените им препорачува здрав начин на живот, ако се земе предвид колку во денешно време се живее брзо и стресно, сепак тие мора макар еден час во текот на денот да се занимаваат со фитнес,трчање или јога.

Највозрасната учесничка на женската трка, 77 годишната Доста Лазаревска од Битола чија животна преокупација и е пчеларството вели дека е постојано физички активна и дека годините се само број, а од голема важност за една жена е како таа се чувствува.

-Важно е жените да се храбри, да вежбаат, да се занимаваат со спорт, и да не му се предаваат на годините. И догодина доколку ме служи здравјето ќе трчам на женската трка во Битола. Јас буквално во денот не застанувам со физичка активност. Тоа ми го полни денот со позитивна енергија да се чувствувам витално-рече на ноќната женска трка „Биди своја“ 77 годишната Доста Лазаревска.

Инаку, женската атлетска трка „Биди своја“ по улиците низ Битола беше во организација на спортското здружение „Бори се за целта“.