На улицата Симеон Кавракиров во Мичурин фалат пешачки премини, секој претрчува кај ќе стигне
Од Општина Аеродром, во чија надлежност е оваа улица, досега нема одговор дали се планира реконструкција на оваа сообраќајница или барем обележување со повеќе пешачки премини, семафори и слично за да се зголеми безбедноста на сите учесници во сообраќајот.
Загрижени граѓани од населбата Мичурин укажуваат дека улицата Симеон Кавракиров е небезбедна за пешаците затоа што на неа со години речиси нема никаква хоризонтална ниту вертикална сигнализација. Како што велат, на улицата има само два пешачки премини, едниот е лоциран кај семафорите близу кафаната „Рулет“ и другиот во близина на основното училиште „Блаже Конески“. Поради нивната оддалеченост, како што тврдат, повеќето граѓани улицата ја минуваат непрописно, каде што ќе стигнат и со претрчување, со што се загрозува нивната безбедност.
Препорачано
На двете раскрсници на улицата во минатото имало пешачки премини, но тие не се обновени со децении, а нема ни вертикална сигнализација за пешачки премин и пропишана брзина на движење.
Друг проблем со кој се соочуваат жителите, кои велат дека оваа улица „плаче“ за реконструкција, е непрописното паркирање по тротоарите, поради што пешаците, сакале или не, мора да се движат по улица.
Сѐ додека не се реши паркирањето, овие две раскрсници се многу опасни бидејќи прегледноста при вклучување на улицата е сведена на минимум. По тротоарите редовно има коли дури и големи комбиња, па се создаваат опасни ситуации и за возачи и за пешаци. Слабо видливи се и пешачките на самиот крај од улицата кај „Блок кафе“, но таму барем има еден знак дека има пешачки премин – вели жител на населбата.
Во групата каде што аеродромци редовно укажуваат на проблемите со кои се соочуваат во секојдневното живеење „Општина Аеродром-Граѓанска патрола“, граѓаните посочуваат и на небезбедната раскрсница.
Најпрометната раскрсница во Аеродром, необележана, тука пешаците секојдневно имаат мака да не ги прегази некој. Под итно треба да се реши со кружен тек или слично, секако и да се обележи не само оваа улица туку и сите други додека не настрадал некој – се вели во еден од коментарите.
До овој момент од Општина Аеродром, во чија надлежност е улицата Симеон Кавракиров, нема одговор дали се планира реконструкција на оваа сообраќајница или барем обележување со повеќе пешачки премини, семафори и слично за да се зголеми безбедноста на сите учесници во сообраќајот.
Досега залудни се и сите апели на граѓаните од Аеродром и за улицата Васко Карангелевски, на која и по година и пол од реконструкцијата се оставени само лежечки полицајци, а за крстосницата пред училиштето не се најде побезбедно решение.
Родители на ученици, загрижени за своите деца кои секојдневно ја минуваат крстосницата за да стигнат до училиште, во декември одржаа мирен протест и побараа од градските власти ново сообраќајно решение што ќе ја зголеми безбедноста на булеварот. Тие посочија дека мора да се постават семафори, затоа што само така би се овозможило безбедно движење на сите учесници во сообраќајот.
Од Град Скопје пред неколку месеци во одговор за „Слободен печат“ истакнаа дека веќе се преземени мерки и дека се планира поставување семафори, но тоа мора да го одобри МВР. Оттаму објаснија дека се имплементирани неколку мерки за зголемување на безбедноста во сообраќајот како зона на школо, вибрирачки ленти и други мерки што значително придонесуваат за намалување на брзината на возилата.
Изготвен е и проект за воведување нови семафори на крстосницата помеѓу улиците Васко Карангелевски и Ангел Димовски, кој во согласност со Законот за безбедност на сообраќајот на патиштата е доставен до СВР Скопје и сѐ уште се чека добивање на потребната согласност за негова имплементација. Досега Град Скопје до Секторот за внатрешни работи имаше доставено ОСП за светлосни сигнали (семафори) за истата локација, но трипати е одбиено и од таа причина не можеше да се спроведе на терен – објаснија оттаму.
И од ЈП „Паркови и зеленило“ за јавноста потврдија дека неколкупати е доставување барање за семафори до МВР, кое е неколкупати одбиено.
Град Скопје есента 2023 година ја заврши изградбата на оваа улица, која овозможува сообраќајно поврзување на три главни булевари во општината – АСНОМ, Јане Сандански и Трета македонска бригада. На улицата има по две коловозни ленти во двете насоки во должина од 1100 метри, велосипедски и пешачки патеки, а е изведена и нова атмосферска канализација.
Од Градот тогаш се пофалија дека со ваквото сообраќајно решение се зголемува безбедноста на сите учесници во сообраќајот, но во практика се покажа дека не е така.
