Српскиот претседател Александар Вучиќ изјави дека официјално го поканил американскиот претседател Доналд Трамп да ја посети Србија, пренесе РСЕ.

По говорот на Генералното собрание на ОН, Вучиќ изјави дека испратил официјална покана до Трамп преку Стејт департментот за време на средбата во вторник со американскиот државен секретар Марко Рубио, објави агенцијата Бета.

„На средбата со секретарот Рубио, тонот беше пријателски, разговорот беше искрен, отворен и исклучително значаен“, изјави Вучиќ за новинарите.

Вучиќ претходно објави на Инстаграм профилот „Иднината на Србија“ дека имал важен и значаен разговор со Рубио.

Како што е наведено во соопштението, разговорот бил фокусиран на зајакнување на политичкиот дијалог меѓу Србија и САД, подобрување на економската соработка и заедничките безбедносни предизвици.

Посебен акцент бил ставен на прашања од областа на економијата и трговијата, вклучувајќи го решавањето на американските царини, како и можностите за нови инвестиции, соработка во енергетиката и развој на нови технологии. Беа разгледани и перспективите што ги нуди механизмот за стратешки дијалог меѓу двете земји.

Вучиќ истакна дека Србија е посветена на зачувување на мирот и стабилноста како предуслов за понатамошен напредок и подобар живот за граѓаните. Тој им се заблагодари на САД за нивната улога во заштитата на безбедноста на српскиот народ во Косово, како и за нивниот придонес во дијалогот меѓу Белград и Приштина.

Тој, исто така, ја нагласи важноста на американската поддршка на европскиот пат на Србија, наведувајќи дека полноправното членство во Европската Унија е една од стратешките цели на земјата.

„Отворен и искрен дијалог, заснован на меѓусебна доверба и почитување, е најдобриот начин за зајакнување на партнерството меѓу Србија и САД“, рече Вучиќ, додавајќи дека верува оти односите меѓу двете земји ќе добијат дополнителен импулс во иднина, во нивна меѓусебна корист и во интерес на мирот, стабилноста и просперитетот.