Режисерот Емир Кустурица постојано ги поддржува студентските блокади и протести во Србија, што очигледно не поминува добро кај властите, па неговиот ресторан „Висконти Мокра Гора“ одненадеж беше затворен, пренесува „Данас“.

„Имајќи ги предвид фактите наведени во записникот од даночната ревизија за евидентирање на прометот преку електронски фискални уреди и работното ангажирање на вработените, ве известуваме дека е утврдена неправилност за која е предвидена мерка привремена забрана за вршење дејност, која ќе се спроведе на 25.07.2025 година“, се наведува во извештајот на даночниот инспектор од Ужице, до кој медиумот „Данас“ имал пристап. 

За затворањето на ресторанот, се огласи и самиот Костурица.

„Наградата на Александар Вучиќ и Синиша Мали за најдобро село во светот, барем на скалата на УНЕСКО“, кратко коментираше Кустурица.

„Данас“ потсетува дека најдобриот тенисер во светот Новак Ѓоковиќ и прославениот режисер Емир Кустурица некогаш биле бескрајно фалени во провладините медиуми, додека сега станаа главни непријатели на државата, само затоа што ги поддржуваат студентите.  Против нив се води остра кампања и провладините медиуми и се обвинети за скандали.

Кустурица претходно се спротивстави на потезите на сегашната влада, првенствено во нејзината намера да рудари литиум во Србија.

„Подготвен сум да го изгубам животот во борбата против оние што ја уништуваат животната средина или оние што сакаа да рударат кобалт, никел или литиум на територијата на Србија“, рече режисерот минатата година.