Снимањето на дебитантскиот долгометражен игран филм со работен наслов „Потстанар“ на режисерот Марко Ѓоковиќ, во продукција на „Сектор Филм“ почна на 15 јуни. Сценаристи на филмот се Марко Ѓоковиќ и Симеон Венциславов од Бугарија. Филмот се снима на повеќе локации низ Скопје. „Потстанар“ е психолошка драма инспирирана од драмскиот текст „Владимир“ на словенечкиот автор Матјаж Жупанчиќ.

Приказната ги следи тројцата пријатели чиј заеднички живот добива неочекуван пресврт кога зад шармантната фасада на нивниот нов цимер започнува да се открива неговата вистинска, манипулативна природа. Во ограничениот простор на заедничкото живеалиште, борбата за лична слобода станува неизвесна.

Главните улоги ги толкуваат младите и талентирани македонски актери Ана Јовановска, Илија Волчевски и Хакан Даци, како и Албан Укај од БиХ – искусен актер, кој се прослави со впечатливата улога на Сокол во филмот „Lorna’s Silence“ на браќата Дарден.

Во останатите улоги се Николина Кујача, Камка Тоциновски, Софија Куновска, Борис Дамовски, Адем Карага, Стефанија Начевска, Мина Јелушиќ, Лазар Христов, Бранко Атанасов и Матеа Јанковска.

„Сектор Филм“ го реализира проектот „Потстанар“ во копродукциска соработка со „Мир медиа груп“ и „Ливинг пикчрс“ од Србија, како и со „Парангал Филм“ од Црна Гора, со поддршка од Агенцијата за филм на Македонија, Филмскиот центар на Србија и Филмскиот центар на Црна Гора.

Директор на фотографија е Александар Крстевски, сценограф е Сашо Блажевски, костимограф е Розе Трајческа, шминкер е Снежана Ангеловска Живковска, снимател на звук е Дејан Михајловски, а кастинг-директор е Милка Анчевска.

Продуценти се Владимир Анастасов и Ангела Несторовска од „Сектор Филм“, додека копродуценти се Александар Протиќ, Димче Стојановски, Стефан Орландиќ (од Србија) и Маја Кецојевиќ (од Црна Гора).