Потикнати од слабите жетви во Гана и Брегот на Слоновата Коска, најголемите производители на какао во светот, цените на чоколадото скокнаа на глобално ниво, пишува Н1. Но, во која земја од Европската Унија потрошувачите доживеаја најголемо зголемување на цените? Полска го освои првото место, бидејќи во мај оваа година таа земја забележа зголемување од 39,1 процент во споредба со истиот период минатата година.

Низ цела Европа, цените во мај беа во просек за 21,1 процент повисоки отколку една година претходно, според податоците на Евростат. Други земји кои забележаа значителен скок на цените се Естонија (+37,9 проценти), Литванија (+36,5 проценти), Латвија (+33,2 проценти), Шведска (+28,0 проценти) и Финска (+26,0 проценти). Од друга страна, растот на цените беше поблаг во Луксембург (+5,2 проценти), Кипар (+9,0 проценти), Италија (+12,0 проценти), Малта (+12,2 проценти) и Австрија (+13,4 проценти). Какаото, кое порано се продаваше за помеѓу 2.000 и 3.000 евра по тон, во еден момент достигна до 13.000 евра по тон. Аналитичарите очекуваат цената да остане околу 9.000 евра до крајот на годината. Во текот на сезоната 2023/2024, глобалниот пазар на какао забележа пад на производството.

Меѓународната организација за какао процени дека производството се намалило за околу 10 проценти во споредба со претходната сезона. Експертите го припишуваат овој недостиг на какао на различни причини, како што се лошите временски услови – вклучувајќи интензивни врнежи од дожд проследени со подолги од вообичаените суви сезони – климатските промени и болестите што влијаат на посевите во Западна Африка, пренесува Фактор.ба.