Репрезентацијата на Бугарија избори пласман во големото финале на Светското првенство на Филипините, откако во полуфиналето ја совлада селекцијата на Чешка со 3:1 во сетови (25:20, 23:25, 25:21, 25:22).

За Бугарите ова е прво финале на едно Светско првенство по цели 54 години, последен пат беа финалисти далечната 1970 година, кога на домашен терен стигнаа до сребрениот медал, а титулата ја освои тогашна Источна Германија. Во новото финале, Бугарија ќе се сретне со победникот од второто полуфинале меѓу Полска и Италија.

Историски гледано, Бугарија никогаш не успеала да стигне до злато на големите натпреварувања. Освен среброто од СП и ЕП, имаат и четири бронзени медали, како и финале на Олимписките игри во Москва 1980.

Најзаслужен за триумфот против Чешка беше 22-годишниот Александaр Николов, кој одигра брилијантен натпревар и средбата ја заврши со 31 поен, 27 поени од напад, еден блок и три аса.

Неговиот помлад брат, 18-годишниот Симеон Николов, имаше одлична улога во офанзивната организација на играта и додаде девет поени, пет во напад, два од блок и два директни поени од сервис.

Од другите избраници на италијанскиот селектор Џанлоренцо Бленџини, се истакнаа и Алекс Грозданов со 12 поени, Асарпух Асарухов со 10, Мартин Атанасов со осум и Илија Петков кој додаде пет поени.

Преземено од: Спорт.ком.мк