Општина Кисела Вода го одбележи Меѓународниот ден на лицата со попреченост со изградба на првата инклузивна училница на отворено, како и отворање нова сензорна соба во основното училиште „Рајко Жинзифов“ во Драчево.

Според градоначалникот Орце Ѓорѓиевски, Кисела Вода е лидер во промовирањето и заштитата на правата на лицата со посебни потреби.

Оваа соба е само дел од заложбите на општината, која веќе има отворено вакви простории во останатите училишта на својата територија. Во дворот на училиштето во завршна фаза е и изградбата на инклузивна училница на отворено, прва од ваков вид во општината. Инклузивните училници се дизајнирани да ги задоволат потребите на сите ученици, овозможувајќи им на децата со посебни образовни потреби да учат заедно со своите врсници. Оваа училница ќе биде опремена со дидактички материјали и предмети од секојдневниот живот кои поттикнуваат креативност, моторика, сетила и когнитивни способности – вели градоначалникот Ѓорѓиевски.

Тој информира дека е потпишан меморандум со Институтот за специјална едукација и рехабилитација и во рамките на оваа соработка ќе има стручна пракса со студентите и наставниот кадар од институтот во сензорните соби, со што ќе им се овозможи на родителите поддршка и згрижување на децата со атипичен развој вон наставата и во попладневните часови.

Дополнително, ќе потсетам и на отворањето на бесплатниот дневен центар за децата со церебрална парализа, дневниот центар за лица со попреченост, обезбедувањето на тактилни патеки, Брајово писмо и други услуги за лицата со оштетен вид, како и рампи во објектот на општината. Воедно, Кисела Вода е првата општина која има целосно инклузивно основно училиште, а отвори и целосно инклузивна јавна детска градинка – посочува градоначалникот.