Алекс Бати, момчето од англискиот град Олдам по кое се трагаше шест години, се појави самото во пустелија кај Тулуз во Франција, здраво и живо.

Вџашен од глетката како момче пешачи по локален пат на непристапно место на падините на Пиринеите, возач на комби запрел за да му помогне и се стаписал кога детето му раскажало дека тргнало „од планините“ и дека веќе четири дена талка, и самиот не знае каде, кон „некој голем град“ и му објаснило: „Мајка ми ме грабна кога имав 12 години!“.

– Го видов детето како пешачи на силен дожд. На враќање решив да запрам за да го префрлам до каде треба. Високо, со фармерки, џемпер и ранец, носеше скејтборд и батериска светилка во раката. Прво се претстави како „Зак“ и дури по три часа ми го кажа вистинското име и ми ја раскажа својата приказна – изјави возачот Фабиен Асидини.

Момчето му рекло дека едноставно му здодеало да биде со мајка си и посакало да се врати во Англија. Алекс едно време живеел во „луксузна куќа во Шпанија со десетина членови на духовна заедница“, а потоа по разни места на Пиринеите, кои се популарно место за групи што настојуваат да се изолираат од цивилизацијата. Во 2021 година Алекс се префрлил од француската страна на Пиринеите.

– Живеел со мајка си во духовна заедница, далеку од нормалниот живот. Алекс ми кажа дека неговата мајка е „малку луда“, но никогаш не го чувала со себе на сила. Можел да замине кога сака. Немал ништо лично против неа, но сакал да си ја најде бабата. Му недостасувала – раскажа возачот.

Асидини го одвезол момчето во жандармерија, за да закрепне. Го сослушале момчето и го испратиле да преноќи во дом. Жандармите го потврдиле идентитетот и стапиле во контакт со англиските колеги за да ја известат неговата баба Сузан Каруана од Олдам. Преку профилот на Фејсбук на возачот, Алекс воспоставил контакт со баба си и ѝ напишал: „Здраво Бабо, Јас сум во Франција, Тулуз. Навистина се надевам дека ќе ја добиеш оваа порака. Те сакам и сакам да се вратам дома“.

Нема никакви информации за мајката и дедото на Алекс (воедно ќерката и сопругот на Сузан), кои во 2017 година тргнале со детето на одмор. По нив е распишана потерница поради сомневање за киднапирање. Тројцата последен пат биле забележани на 30 септември 2017 година во Марбелја во Шпанија, каде што уплатиле летување, а на 8 октомври, денот кога им завршил аранжманот, биле забележани во пристаништето Малага.

Француското обвинителство по итна постапка го предало случајот на британската полиција, која бара начин како да го префрли момчето во Олдам, бидејќи неговата баба не е во состојба да отпатува во Франција.

Бабата раскажа дека со сопругот и ќерката веќе живееле во „духовен центар“ во Мароко. Мелани била „бунтовна тинејџерка, пиела и се забавувала“ поради што нејзините родители не можеле да излезат на крај со нејзиното темпо и финансиските потреби. Мелани завршила колеџ, но не можела да најде работа, а во 2006 година го родила Алекс. За момчето се грижела бабата, која се разделила од сопругот Дејвид, кој имал „здравствени проблеми“. По терапијата, тој „драматично се променил“, се посветил на духовноста и заедно со ќерка си се приклучил на култ.

Кога Алекс имал осум години, тројцата отпатувале во заедница во Мароко. Мајката подоцна со ново момче заминала за Бали, а Алекс се вратил во Олдам. По долг спор, бабата Сузан од судот добила старателско право на момчето, а од ќерка си налог да ѝ плати 500.000 фунти. Но, кога во октомври 2017 година Мелани се вратила за да замине на одмор со синот, им се изгубила секаква трага.