Брод за крстарење со 206 патници и членови на екипажот се насукал во северозападниот дел на Гренланд, а спасувачите нема да пристигнат до петок, соопштија властите. Оушн Екслорер се насукал во понеделникот во Алпефјорд во националниот парк, 1.400 километри североисточно од Нуук, главниот град на Гренланд, соопшти Заедничката арктичка команда (JAC) на данската војска.

„Бродот за крстарење во неволја очигледно е причина за загриженост. Најблиската помош е далеку, нашите единици се далеку, а времето може да биде многу неповолно“, рече шефот на операции на JAC, Брајан Џенсен.

Тој додаде дека најблискиот брод на данската морнарица е оддалечен околу 2.000 километри и дека се движел кон местото на заглавување, пишува Скај њуз.

„Но, во оваа специфична ситуација не гледаме директна опасност по човечките животи или животната средина, што е охрабрувачки“, посочи тој. Властите контактирале со друг брод за крстарење во областа и од нив било побарано да остане во близина за да помогне во случај ситуацијата да се промени.

Заглавениот крстосувач може да се ослободи и за време на плимата и осеката, објави претходно гренландската телевизија КНР. Сепак, JAC на својата Фејсбук страница вчера објави дека бродот сè уште е заглавен и покрај плимата. „Без разлика на тоа, најважно за нас е сите да стигнат на безбедно“, рече Јенсен.

Портпаролот на австралискиот оператор Аурора Експедишонс рече дека сите во бродот се безбедни и здрави. Oушн Експлорер бил направен во 2021 година и може да прими до 134 патници. Нуди патувања до „некои од најоддалечените дестинации на планетата“, се вели на веб-страницата на агенцијата.