На Грција ќе ѝ требаат дополнителни два милиони работници во следните десет години, од кои една четвртина ќе бидат висококвалификувани лица. Таа веќе се соочува со  недостиг на работна сила, од 200.000 работници, според националната статистичка служба – пишува Б92.биз.

Демографските предизвици се чувствуваат сè повеќе, а масовните пензионирања се закануваат да го нарушат производството и социјалната сигурност, додека истовремениот економски развој на земјата води и до создавање нови работни места, објавува агенцијата Бета. Сепак, овие нови работни места бараат висококвалификувани лица со дипломи и докторати за анализа на податоци, специјалисти за машинско учење, софтверски инженери и креатори, техничари за автоматизација итн.

Овие индустриски сектори и работници се особено вредни за грчката економија бидејќи ќе ја зголемат нејзината динамичност и конкурентност, правејќи ја поориентирана кон странски земји, пишува весникот Катимерини.
Оваа двојна закана од масовни пензионирања и потребата од различна квалификувана работна сила претставува значителен ризик за грчката економија, а експертите нагласуваат дека само сеопфатен сет на решенија ќе може да обезбеди пополнување на овој проектиран недостиг на работна сила.

„Кога постојат слободни работни места и невработеност значи неискористен БДП и неискористен човечки капитал“, рече Константинос Аграпидас, генерален директор за работни односи во грчкото Министерство за труд.

Според него, успешното поставување на темелите за справување со оваа промена на работната сила би можело да ги зголеми приходите, потрошувачката, продуктивноста и извозот, а воедно да го намали притисокот врз јавните финансии и пензискиот систем.

Предложените мерки вклучуваат понатамошно искоренување на родовата нееднаквост на работното место, како и обука и преквалификација на постари работници, пишува весникот. Недостатокот може да се реши и со привлекување висококвалификувани работници од странство, интегрирање на мигрантите кои веќе се во Грција или нудење стимулации за репатријација на Грците во странство.

Според Аграпидас, ваквите политики би можеле да пополнат најмалку 100.000 слободни работни места и да го зголемат БДП за најмалку еден процент.