На овогодинешниот Евровизиски натпревар ќе бидат забранети не само знамињата во боите на виножитото, кои се симбол на ЛГБТК+ заедницата, туку и палестинските и „европските“ знамиња, објави холандскиот јавен радиодифузен сервис АВРОТРОС.

Ова е всушност објаснување за одлуката на Европската радиодифузна унија ЕБУ (EBU) учесниците на фестивалот да можат да го носат само знамето на својата земја, објавија холандските медиуми.

Организацијата за правата на ЛГБТК+ заедницата, „ЦОЦ“ (COC), ја оцени оваа одлука како целосно апсурдна, пишува „НЛ Тајмс“ (NL Times). Објаснувајќи ја одлуката, АВРОТРОС нагласи дека Евровизискиот натпревар не е политички настан, па иако знамето со виножито не е политичка порака, како што наведоа, ЕБУ сакаше да го забрани прикажувањето и на тоа знаме.

Од организацијата „ЦОЦ“ изјавија дека носењето на знамето со виножито е израз на ЛГБТК+ идентитетот и дека сака холандскиот јавен радиодифузен сервис да побара од EБУ да ги повлече новите правила за прикажување на знамињата, но холандскиот јавен радиодифузен сервис одлучи да не го стори тоа.

ЕБУ вчера исто така објави дека Клод, холандскиот претставник на Евровизискиот натпревар, може да го носи само холандското знаме на сцената, а дека може да го покажува знамето на Конго, каде што живеел до својата деветта година, само во неофицијални простории.