Младата Полјачка Јулија Вендел, која тврди дека е малата Медлин Мекен, 3-годишното девојче кое исчезна во 2007 година од одморалиштето Алгарве во Португалија, е уапсена на аеродромот во Бристол, во Британија.

Според Дејли мејл, аеродромската полиција ја уапсила под сомнение дека ги малтретирала родителите на Медлин, Кејт и Гери.

23-годишната девојка, како што ја опишуваат британските медиуми, слетала во Британија каде што требало да се сретне со пријател и била опкружена од полицајци. Уапсена е и нејзината пријателка на околу 60 години.

Тврдењата на Вендел предизвикаа големи превирања во семејството на малата Медлин, кои по толку години сè уште бараат одговори за тоа што се случило со нивното девојче, кое една вечер мистериозно исчезна од нејзиниот кревет во одморалиштето каде што биле на одмор.

Направен е ДНК тест кој се покажа негативен, но 23-годишната девојка инсистира на повеќе тестови бидејќи сè уште верува дека таа е исчезнатата девојка. Сепак, семејството категорично одбива дополнително да елаборира за овој случај.