Вал Килмер, една од најпознатите холивудски ѕвезди, почина на 65-годишна возраст од воспаление на белите дробови, откако претходно му беше дијагностициран рак на грлото.

Актерот се соочуваше со оваа болест од 2014 година, но по третман со хемотерапија и операција на душникот, успеа да се опорави, иако тоа значително му ги намали гласовните способности.

Роден во Лос Анџелес во 1959 година, Килмер беше еден од најмладите студенти што некогаш биле примени на престижната актерска програма на Џулијард. Кариерата ја започна во театарот, а кон крајот на 1980-тите стекна популарност со улогите во комедиите „Строго тајно!“ („Top Secret!“) и „Вистински гениј“ („Real Genius“). Светската слава ја достигна со улогата на Ајсмен во „Топ ган“ („Top Gun“), каде што ја запозна својата идна сопруга Џоан Вејли, со која имаше две деца. Двојката се разведе во 1996 година.

Големиот режисер Оливер Стоун му ја довери улогата на Џим Морисон во биографскиот филм „Дорс“ („The Doors“), а Килмер се прослави и со улогите на Елвис Присли во „Вистинска романса“ („True Romance“) и Док Холидеј во вестернот „Гробен камен“ („Tombstone“). Неговата извонредна изведба во овој филм му донесе можност да го толкува Брус Вејн во „Бетмен засекогаш“ („Batman Forever“), што се смета за врв на неговата кариера.

По помалку успешните филмови „Светецот“ („The Saint“), „Островот на доктор Моро“ („The Island of Dr. Moreau“) и „Црвената планета“ („Red Planet“), Килмер се сврте кон помали филмски проекти.

Во 2005 година настапи заедно со Роберт Дауни Џуниор во криминалистичката комедија „Бакнеж, бакнеж, пукање“ („Kiss Kiss Bang Bang“), а во 2012 година ја одигра улогата на Марк Твен во соло-претставата „Граѓанин Твен“ („Citizen Twain“). Во 2017 година се појави во музичката драма „Песна до песна“ („Song to Song“) на Терeнс Малик. По долга пауза, во 2022 година повторно ја толкуваше улогата на Ајсмен во „Топ ган: Бунтовник“ („Top Gun: Maverick“), каде што неговиот лик беше претставен како командант на Пацифичката флота на САД.

Во последните години од животот, Килмер беше сè поактивен во политиката. Во 2009 година изјави дека размислува да се кандидира за гувернер на Ново Мексико, каде што живееше. Беше присутен на митинзи за претседателската кампања на Ралф Нејдер во 2008 година, а во 2013 година лобираше за религиозни исклучоци од Обамакер.