На 14 септември, во 14:00 часот, ќе се одржи мирен протест пред Специјалниот суд во Хаг, на иницијатива на соборци од дијаспората, објави Организацијата на воени ветерани на ОВК, пренесува Коха.

Овој протест следува по неодамнешниот одржан на 7 август во Приштина, на кој многу граѓани изразија револт против судот со седиште во Хаг, за кој рекоа дека отстапил од својата мисија. 

Еден од организаторите од дијаспората, Фатмир Кочи, ги повика политичките актери и граѓаните да се приклучат на протестот.

„Сега сите знаат за неправдите што им се прават на нашите луѓе во Хаг. Таму не се судат поединци, туку се суди нашата праведна борба за слобода и самата државност на Косово. Затоа, ги повикувам сите институции, партии без оглед на бојата и секој Албанец во дијаспората да бидат заедно пред Судот во Хаг на 14 септември. Да покажеме дека Косово повеќе не прифаќа неправда во име на правдата. Ја добивме војната со крвта на мачениците и поддршката на нашите пријатели и ќе ја добиеме и оваа битка за достоинство и вистина“, рече Кочи.

Од 15 септември, одбраната на поранешните водачи на ОВК ќе започне со презентирање на сведоштвата на сведоците на одбраната.

Поранешните лидери на ОВК, Хашим Тачи, Кадри Весели, Јакуп Красниќи и Реџеп Селими, се обвинети за воени злосторства и злосторства против човештвото. Тие се во притвор од 2020 година.