Министерството за внатрешни работи денеска влегло во кафулето „Класик“ во Кочани кое минатата недела беше демолирано од револтирани протестирачи. Објектот е во сопственост на Дејан Јованов Деко, неформален сопственик на дискотеката „Пулс“ во која загинаа 59 претежно млади лица. Претреси полицијата врши и во подружницата на пазарна инспекција во Кочани.

Како што објави „Слободен печат“, фирмата „ММММ Кафе Дооел“ Кочани, што управувала со кабарето „Пулс“ добила лажна лиценца за работа издадена од Министерството за економија каде како адреса на која е заведена дискотеката фигурира улицата „Крижевска број 2“ во Кочани.
Токму оваа адреса во индустриската зона во Кочани, во близина на кружниот тек, претставува и адресата којашто Државниот пазарен инспекторат ја имал во својот регистар за вршење инспекциски надзори во 2023 година, но тогаш не им била заведена како адреса на која треба да се врши надзорот, туку како адреса на која „се наоѓа седиштето на фирмата „ДПТУУ „ММММ кафе ДООЕЛ“ Кочани, спротивно на тоа што е заведено во Бизнис мрежа. Иако ја имале адресата на фирмата заведена во регистарот, не оделе во дискотеката на инспекциски надзор, туку оделе на другата адреса.

Во лажната лиценца, пак, издадена на 13 март 2024 година, адресите се заведени обратно и на точен начин – седиштето е на „Димитар Влахов“, а објектот на „кабарето“ е на улицата „Крижевска“, како што во реалноста и било.

Според документација што „Слободен печат“ ја доби од свиркачи, инспекторка на Државниот пазарен инспекторат на 28 јуни 2023 година спровела надзор не на адресата каде што се наоѓала дискотеката уште од 2012 година, туку во објект на улицата „Димитар Влахов бр.5 сутерен – 33“ Кочани, која што не е истата адреса на која се наоѓа дискотеката. Оваа информација е потврдена од документација што „Слободен печат“ ја доби од укажувачи од Државен пазарен инспекторат (ДПИ). Можно е инспекцискиот надзор да бил вршен во вториот, сега демолиран кафе-објект на неформалниот сопственик Дејан Јованов – Деко. На хартија, како управител на фирмата фигурирал шанкерот Александар Карадакоски кој е повреден во пожарот и е на лекување во Литванија.

Надзорот што го спровела инспекторката на 28 јуни 2023 година бил вонреден, а во регистарот на извршени инспекциски надзори, графата за изречени мерки е празна, што значи дека најверојатно не била пронајдена неправилност.

На страницата на Државниот пазарен инспекторат на 11 ноември 2024 е објавен неделен извештај (до него може да пристапите на следниот линк), од кој се гледа дека на 29.10.2024 во правниот субјект ДПТУ ММММ Кафе ДООЕЛ Кочани (на кого е издадена лажната лиценца за „Пулс“), е извршен повторно вонреден инспекциски надзор за да се провери дали се почитува Законот за заштита од пушењето, ама не е утврдена неправилност. Не е објавено на која адреса е вршен надзорот.

Нашите извори тврдат дека претставки за вонредни инспекциски надзори до ДПИ во Скопје во врска со фирмата „ММММ Кафе ДООЕЛ Кочани“ стигнувале директно до одделението на ДПИ во Штип, а не во Скопје.

Според податоците во „Бизнис мрежа“, „ММММ Кафе ДООЕЛ Кочани“ била основана на 15 мај 2020 година, а седиштето на фирмата е на „Димитар Влахов“ бр. 5. Во регистарот на пазарната инспекција, пак, седиштето е на „Крижевска“ каде всушност се наоѓа објектот.
Фирмата ММММ кафе ДООЕЛ е со блокирана трансакциска сметка и работела во дејност „ресторани“. Но, објектот во кој се наоѓала дискотеката „Пулс“, всушност бил регистриран за лесна индустрија, а никако за угостителска дејност.

Бројни се пропустите во градежната изведба која воопшто не одговарала на строгите безбедносни стандарди за да може да функционира како кабаре. Објектот немал хидрантска мрежа ни хидрант во употребна функција. Немало доволно противпожарни апарати според квадратурата на објектот, односно имало само два. Немало две излезни врати, колку што е пропишано за евакуација на луѓето, а едната импровизирана метална врата на задниот дел од објектот, била заклучена со катанец и без квака одвнатре, обложена со гипс-картон и сунѓер за звучна изолација.

Немало пристап за противпожарни возила од двете страни, согласно Правилникот за заштита од пожари, експлозии и опасни материи. Внатрешноста на објектот била обложена со гипс-картон кој немал огноотпорни својства. Немало ниту спуштен таван со противпожарна отпорност од најмалку 30 минути. Немало врати со противпожарна отпорност за најмалку еден час, ниту систем кој би ги предупредил посетителите дека настанал пожар со силен звучен сигнал. „Дискотеката“ била непрописно обложена со лесно согорливи материјали за звучна изолација. Во објектот противзаконски биле користени пиротехнички материјали на височина од три метри.

На лице место во кабарето бил присутен и службеник на Државниот инспекторат за градежништво и урбанизам кој констатирал дека објектот во кој се случила несреќата е регистриран како објект за лесна индустрија со површина од 419 квадрати. Никогаш не била извршена пренамена на објектот од лесна индустрија во угостителски објект. И покрај тоа што немало пренамена, тој добил дозвола за работа од Министерството за економија како за угостителски објект издадена пред 15 години.

На 16 март во стравичен пожар, во овој нелиценциран објект загинаа 59 жртви.