Кртови во Министерството за внатрешни работи (МВР) има и наша работа е да ги решиме, велеше во своите јавни настапи министерот за внатрешни работи Панче Тошковски.

Тој и од собраниска говорница, но и во телевизиските интервјуа постојано повторува дека кртовите во МВР преку одредени поранешни високопозиционирани политички функционери од минатото одаваат информации и го оневозможуваат дејствувањето во одредени полициски акции што ги спроведува МВР.

Но, еден од кртовите Министерството за внатрешни работи го најде покрај премиерот Христијан Мицкоски. Ангел Сарамаков бил член на обезбедувањето на премиерот, односно шофер во возилата што одат како претходница на премиерот, а откако објавија дел од медиумите, МВР потврди дека во координација со Обвинителството за гонење организиран криминал и корупција, Сарамаков бил фатен на паркинг-простор пред хотел во Велес со уште едно лице во возило „БМВ“ каде што бил најден ранец со службени материјали од Министерството.

– Во рамките на акцијата, дополнително се извршени претреси на повеќе локации, при што се пронајдени и одземени електронски уреди, службени документи и други предмети релевантни за истрагата. Исто така, од преземените мерки и активности во процесот на проверка, Одделот за внатрешна контрола констатира дека полицискиот службеник постапувал спротивно на законските и подзаконските акти на Министерството за внатрешни работи, со што неовластено поседувал службени материјали, нивно откривање на трети лица надвор од Министерството, а со кои дејствија го извршил кривичното дело по член 360 од Кривичниот законик (КЗ) – соопшти Министерството.

Телохранителот сакал да земе 50 илјади евра

Против него е поднесена кривична пријава и му е определен триесетдневен притвор и однесен е во Шутка. Тој се гони за кривично дело „одавање службена тајна“ од користољубие или заради користење на податоците во странство за што минимална затворска казна е една година, а нема предвиден максимум и може да се движи до 20 години затвор.

Обвинителството за гонење организиран криминал тврди дека ниту лицата, ниту документите не се поврзани со нарко-групата Грчец, како што неофицијално објавуваа дел од медиумите. Според она што го соопштија официјално, осомничениот му покажал на лицето службени документи што се службена тајна, му дозволил да ги снима и планирал да бара 50 илјади евра од друго лице за кое се однесуваат предметите. Всушност, тој се обидел да тргува со службени тајни од МВР.

– Осомничениот како службено лице, вечерта на 30.3.2025 година на паркинг-просторот пред хотел во Велес се сретнал со неповикано лице – сведок во постапката и му покажал службени документи на МВР, што претставуваат службена тајна. Притоа му дозволил на сведокот да ги снима документите, кажувајќи му кој документ за што се однесува. На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите – соопшти Обвинителството.

Опозициската СДСМ бара одговори од МВР како членот од обезбедувањето, кој го назначил лично Мицкоски, имал пристап до тајни информации.

– Тоа што останува како мистерија е дека членот на обезбедување кој го назначил лично Мицкоски нема никаков пристап до тајните информации. Кој му ги доставувал тие информации, до каде ќе оди оваа истрага. Обезбедувањето на Мицкоски кое го избира тој, е поврзано со многу скандали па се поставува прашањето кој ги диригира комуникациите со наркокартелите во државата – изјави портпаролката на СДСМ, Богданка Кузеска.

Минатата година телохранителот на Мицкоски, кој го чуваше додека беше во опозиција, Ивица Бисовски, нападна колега полицаец пред скопскиот локал „Мош“, но самиот полицаец побара од Обвинителството Бисовски да не се гони кривично, а и одделението за дисциплински постапки не утврди одговорност кај него.

Пред околу пет месеци беа уапсени двајца пензионирани инспектори што беа осомничени дека соработувале со криминалната група „Дуќанџик“ од село Грчец, предводена од Шеваљ Муареми, кој е во бегство. Во акција на полицијата во координација со обвинител од Основното јавно обвинителство за гонење организиран криминал и корупција (ОЈОГОКК) беа уапсени три лица – двајца инспектори и еден од припадниците на групата „Грчец“.

Водачите на Грчец уште во бегство

Двајцата поранешни главни инспектори се поврзале со водачот на групата Муареми и преку еден од припадниците на групата, пренесувале и споделувале информации за кривичните постапки што се воделе против групата.

Непосредно пред формирањето на техничката влада, кога сè уште министер за внатрешни работи беше Оливер Спасовски, кривични пријави беа поднесени против 15-члена криминална група, но само петмина завршија во притвор и само ним им се суди.

Спасовски уште тогаш соопшти дека истрагата утврдила дека вработени во МВР, министерства, судови и јавни обвинителства биле поврзани со групата. Бандата од Грчец се товари дека шверцувала кокаин и била вмешана во убиства и обиди за убиства. Кога Тошковски беше уште министер за внатрешни во техничката влада најави апсење на сите членови на групата Грчец, односно оние што се најгоре во хиерархијата на групата, но водачите сè уште се во бегство.

МВР разби дел од групата „Барон/Беланоца“, која беше предводена од Фатљум Ајети Тоте кој од затвор нарачувал убиства и палел автомобили. Во притвор падна и нивниот близок соработник Раде Трајковски Штекли со дел од својата група за трговија со дрога. На оваа група во Шутка им се придружи и поранешниот фудбалер и македонски репрезентативец Данчо Масев, кој пред два месеца беше именуван за директор на фудбалската А-репрезентација на Македонија. Засега нема информации од Обвинителството за што точно се сомничи тој.

Талески: Обезбедувачот е лојален партиски кадар на ВМРО-ДПМНЕ, неговата сопруга била вработена во Општина Велес

Ангел Самараков не е случаен „обезбедувач” кој се нашол до премиерот. Тој е лојален партиски кадар на ВМРО-ДПМНЕ. Неговата сопруга е вработена во Општина Велес и беше кандидат за советник на локалните избори – исто така од редовите на ВМРО-ДПМНЕ. Ова значи дека се работи за човек од најблискиот круг на доверба на Мицкоски, изјави на прес- конференција пратеникот од СДСМ, Миле Талески.

-Пред само неколку месеци, шефот на обезбедувањето на премиерот, нападна полицаец кој бил на должност за време на акција за борба против дрога. Се обидел да ја спречи полицијата во претрес во скопски локал, случај за кој јавноста дозна само откако медиумите го обзнанија па не можеше да се крие. Два инцидента, двајца блиски луѓе до Мицкоски и два обиди од МВР да се прикрие скандалот. Два пати вистината излезе на виделина само благодарение на медиумски притисок.
Затоа прашуваме: Зошто луѓето од доверба на премиерот имаат соработка со подземјето? Дали ова е случајна состојба или организирана шема? Дали веќе не зборуваме за Влада, туку за структура длабоко поврзана со криминални мрежи? Како обезбедувачот имал такви документи, кој му ги дал доверливите информации? Кој друг е вклучен во скандалот од МВР?-праша Талески.