Тренерот на Рома, Жозе Мурињо упати критики за Европската фудбалска федерација (УЕФА) и нејзиниот  систем за финансиски фер-плеј, велејќи дека нема ништо фер во него.

Рома пред неколку дена доби казна од пет милиони евра поради прекршување на финансискиот фер-плеј, а единствен тим што заработи поголема казна е ПСЖ кој мора да плати 10 милиони евра.

– Финансискиот фер-плеј е механизам кој ги казнува виртуозите и ги наградува оние што имаат супер моќи. Финансискиот фер-плеј ги штити најголемите и најбогатите, а ги казнува тие што сакаат да станат големи екипи. Мислам дека треба да се смени името на овој систем бидејќи во него ништо не е фер. Не е фер некој може да потроши 300 милиони, а некој да не може ниту 30 милиони евра. Тешко ни е – изјави Мурињо.

Рома под водство на Мурињо одлично ја започна сезоната и по четири кола има 10 бода, а со евентуална победа над Удинезе вечерва, ќе се врати на лидерската позиција на табелата во Серија А.