Шефовите на дипломатиите на Северна Македонија и Грција, Тимчо Муцунски и Јоргос Герапетритис по денешната средба во Атина порачаа дека двете земји имаат силна соработка во повеќе области и изразија подготвеност таа дополнително да се продлабочи.

На средбата е заклучено дека почитувањето на меѓународното јавно право останува императив за двете страни, а билатералните односи меѓу Северна Македонија и Грција, како и досега, ќе се засноваат на меѓусебно разбирање како соседи и сојузници во НАТО.

Муцунски ја оцени средбата како одлична и контруктивна. Тој изрази искрена благодарност за солидарноста што Грција ја покажа за време на трагедијата во Кочани и неодамнешните итни состојби во близина на Дојран, каде грчки противпожарни екипи и хеликоптери помогнаа во гаснењето на пожарите.

„Тоа не беа само гестови на помош – туку вистински дела на пријателство“, истакна министерот Муцунски.

Тие меѓудругото разговараа за процесот на евроинтеграција на Македонија во Европската Унија, при што грчкиот министер Герапетритис ја нагласи силната поддршка за нашиот евроинтеграциски пат.

„Сакам уште еднаш да ја истакнам поддршката на Грција за напредокот на Северна Македонија на нејзиниот европски пат, врз основа на воспоставените условености и принципот на сопствени заслуги, со посебен фокус на основните критериуми“, додаде грчкиот министер Герапетритис.

Во фокусот на средбата, како што информираа од Министерството за надворешни работи и надворешна трговија, било унапредувањето на соработката помеѓу двете земји, а акцентот бил ставен на потенцијалот за економска соработка помеѓу двете држави, како и на соработката во делот на инфраструктурата и енергетиката.

„Нашиот фокус беше и на резултати кои носат придобивки за граѓаните. Инвестиции. Трговија. Инфраструктура. Енергија. Разговаравме за проекти како Kоридорот 10 и гасниот интерконектор – не само како технички проекти, туку како двигатели на раст, безбедност и регионална поврзаност“, нагласи министерот Муцунски по средбата.

Шефовите на двете дипломатија над два часа разговараа на средбата и работниот ручек во Министерството за надворешни работи на Грција за време на првата посета на министерот Муцунски во Атина, а во фокусот беа билатералните односи, соработката во повеќе области, ЕУ перспективата на регионот итн.

Пред средбата грчките медиуми го критикуваа изоставување на уставното име на земјата од страна на македонските функционери.

Муцунски денеска во Атина ќе се сретне со шефот на грчката дипломатија Герапетритис