Министерството за труд и социјална политика заедно со Државниот инспекторат за труд соопшти детали за трагичната несреќа на 17-ти ноември кога на градилиштето лоцирано на ул. Пиринска бр. 31 во Скопје во кој животот го загуби градежниот работник Т.М.

-На ден 17.11.2023 година околу 16:15 часот по добиена телефонска дојава од страна на градежен инспектор од Општина Центар за случена несреќа на работа на мобилно градилиште на ул. Пиринска бр.31 во Скопје, на самото место увид извршија инспектори од областа на безбедност и здравје при работа при што од нивна страна беше утврдено дека вработениот извршувал работни активности за правен субјект кој изведува градежни работи на градилиштето – ископ на јама. Изведувачот на градежните работи имал склучено договор за изведување на градежни работи со инвеститорот на објектот. Вработениот Т.М. бил ангажиран од страна на изведувачот на работно место багерист согласно законските одредби со склучен Договор за вработување на неопределено работно време и пријавен во задолжителното социјално осигурување. Несреќата на работа со фатални последици се случила кога вработениот вршел ископ на последните кубици чакал од ивицата на темелната (градежната) јама при што земјиштето под него почнало да се обрушува, а вработениот Т.М. заедно со багерот паднал во темелната јама. При падот багерот се превртел, а работникот останал приклештен во кабината на багерот и се здобил со тешки повреди кои за кратко време по извлекувањето предизвикале смрт кај работникот, соопшти МТСП.

Оттаму додаваат дека од страна на инспекторите веднаш е дадена забрана за работа на мобилното градилиште за сите правни субјекти инвеститор, изведувач и надзор поради постоење непосредна опасност по безбедноста и здравјето при работа на вработените заради необезбедени мерки за безбедност и здравје на вработените на самото градилиште.

-По изречената инспекциска мерка–забрана државните инспектори за труд континуирано вршеа контрола дали истата се почитува се додека не беа создадени безбедни услови за работниците во понатамошни дејствија на градилиштето. Државните инспектори за труд по извршените вонредни инспекциски надзори утврдија дека кај три правни субјекти не се превземени соодветни мерки во согласност со прописите од областа на безбедност и здравје при работа што резултирало со тешка повреда со смртни последици на работникот, поради што ќе бидат поднесени кривични пријави за сите правни субјекти заради предизвикување на опасност при градежни работи согласно член 289 од Кривичниот законик до надлежното Основно јавно обвинителство за понатамошно постапување, соопшти Министерството и додава дека Државниот инспекторат за труд продолжува со вршење на континуирани инспекциски надзори на градежните објекти, а со цел да се обезбеди доследна примена на одредбите од Законот за безбедност и здравје при работа и безбедна работна средина за сите работници.

Државниот инспекторат за труд изрази длабоко жалење за загубата на животот на работникот и искрено сочувство до семејството.

Стевче Јакимовски реагираше за случајот

Случајот со загинатиот работник на градилиштето во Дебар Маало пред два дена го актуелизираше градоначалникот на Општина Карпош Стевче Јакимовски, обвинувајќи ја партијата ВМРО-ДПМНЕ дека сака да „заташка соучество на некој симпатизер или член, исто онака како што беше смртта на Мартин Нешковски“.

„Повторно се потрудија максимално да ги прикријат погибјата на кутриот работник. Се прашувате кој е толку важен за ВМРО.Тој не бетонизира, не е урбан мафијаш, а како што слушам тој е еден од најголемите донатори на неговата партија. Тој истиот гради и во Општина Карпош, кај бензиската во Козле, градеше и во Тафталиџе и нема ни оф ни леле, не им треба ни трева, ни дрва, ни паркинзи ниту воздух, бидејќи истиот како што велат е и бизнис партнер со еден од потпретседателите на ВМРО.Претпоставувам нивната процена е вреди да се мижи, не со едното туку со двете очи и јазикот да се држи позади забите затоа што се работи за Ивица Георгиевски со партизанско име – Фреди, напиша Јакимовски на Фејсбук.

Тој побара да се истражи дали ископот се вршел без одобрение за градба кое е издадено подоцна и дали бил вршен притисок врз надлежни институции да се минимизира и случајот да се стави на спореден колосек.