МРК Куманово официјално од вчера ги започна подготовките во пресрет на вториот дел од сезоната.

МРК Куманово влегува амбициозно со цел да обезбеди што подобра позиција во пресрет на плеј-аут лигата каде главна цел е да се обезбеди опстанок оваа сезона.

Клубот максимално го искористи преодниот рок и се засили со шест нови ракометари. Од Бразил дојдоа Жоао Виктор Соарес Флорес, Џанкарло Фелипе Хен и Гилерме Да Силва Фернандес.

Од Хрватска пристигна Лука Матачиќ, а екипата ја засилија и македонските ракометари Стефан Лазаревски и Григор Трајковски. Од тимот позајмица до крајот на сезоната во Младост од Богданци заминаа Уча Гамзардија и младиот пикер Борјан Цековски.

На првиот тренинг тренерот на МРК Куманово ги имаше сите ракометари на располагање, освен бразилските интернационалци кои треба во Куманово да пристигнат до крајот на наредната недела.