Француското обвинителство отвори истрага против напаѓачот Килијан Мбапе поради наводно сомнителни парични трансакции кон петмина полицајци кои биле дел од тимот за обезбедување на националната фудбалска репрезентација.

Како што јавуваат француските медиуми, единицата за борба против перење пари алармирала дека станува збор за нетипични финансиски движења, по што случајот добил правна тежина и бил предаден на надлежните институции.

Според првичните информации, Мбапе наводно исплатил над 180.000 евра „на црно“ за приватни услуги, што го подигна сомнежот дека можеби се работи за незаконски активности. Сепак, од Обвинителството потенцираат дека истрагата сè уште е во рана фаза и допрва треба да се утврди дали има елементи на кривично дело.

Во меѓувреме, од тимот на Мбапе реагираа со соопштение во кое нагласуваат дека сите трансакции се извршени законски и дека фудбалерот нема што да крие.