Возачот на Гресини, Алекс Маркез, ја освои својата прва победа во кариерата во кралската класа откако триумфираше на Големата награда на Шпанија, петтата трка од сезоната во шампионатот на Мото ГП.

Помладиот Маркез, кој претходно четири пати беше на највисокото место на подиумот во класата Мото3, како и осум пати во Мото2, ја постигна победата во својата 93 трка во најсилната класа.

Шпанскиот мотоциклист победи со секунда и пол предност пред Фабио Квартараро од Јамаха, кој се врати на подиумот за прв пат од средината на октомври 2023 година и трката во Индонезија.

На третото скалило од подиумот се искачи возачот на Дукати, Франческо Бањаја, кој заостануваше шест и пол десетинки.

Трката на патеката Ангел Нието беше обележана и со голема грешка на осумкратниот светски шампион Марк Маркез, кој излета од патеката во третиот круг. Претходно, постариот Маркез се бореше за второто место со својот соиграч, кој возвраќаше по секој напад, а имаше и контакти.

По првото место, Алекс Маркез се врати на врвот во генералниот пласман и сега има 140 бодови, еден бод повеќе од неговиот постар брат Марк Маркез, додека Бањаја е трет со 120 бодови.

Светскиот шампионат продолжува со Големата награда на Франција во Ле Ман од 9 до 11 мај.