Македонските градежни компании треба да имаат носечка улога во значајните инфраструктурни проекти во државата. Тоа ќе го намали одливот на градежни работници од земјава и ќе го спречи згаснувањето на добрите фирми, порача Јелисавета Георгиева Јовевска, потпретседателка на Стопанската комора на првата Конференција за патна инфраструктура на тема: „Искуства, предизвици и перспективи“, што се одржа во Охрид. Таа потенцираше дека тековни и планирани инвестиции во државата има и реализацијата на капиталните расходи расте (според податоците на Министерството за финансии до 30 септември, од вкупно планираните 760 милиони евра за капитални инвестиции за 2023 година, реализирани се близу 60 отсто).

– Ја охрабруваме Владата одлучно да ги спроведе сите зацртани проекти со интегрирање на нашиот потенцијал, професионалните и квалитетни компании, но не само во реализација на проектите туку и во креирање на легислативата, која значи рамка во работењето на компаниите. Посебно тука го потенцирам новиот Закон за градење, кој е во процедура на подготовка и по кој не треба да се избрзува со негово носење пред да бидат вклучени забелешките на сите релевантни чинители, со цел на терен да нема проблеми што би претставувале пречка за целосна реализација на зацртаното – рече Георгиева Јовевска.

Од СКСМ повикуваат на одговорност за доцнење, односно ненавремената реализација на инфраструктурните проекти и бараат државата да стави акцент на децентрализацијата заради рамномерен регионален развој.