Монтана стана првата сојузна држава во САД што ја забрани популарната кинеска апликација и социјална мрежа „Тикток“, а основачите на платформата најавија дека ќе ги тужат властите во државата бидејќи забраната, според нив, го прекршува правото на слобода на говор од американскиот Устав.

Републиканскиот гувернер на државата, Грег Џанфорте , потпиша указ за закон со кој им забранува на продавниците за мобилни апликации да го нудат „Тикток“.

Новиот закон забранува преземање на апликацијата во државата и ќе го казни секој „субјект“ – продавница за апликации 10.000 долалри, секогаш кога некому „ќе му се понуди можност“ да пристапи до платформата за социјалните медиуми или да ја преземе апликацијата. Казните нема да важат за корисниците.

Мерката треба да стапи на сила од 1 јануари 2024 година и се очекува да биде оспорена законски.

„Тикток“ е во сопстеност на кинеска технолошка компанија која е под интензивно истражување за можно шпионирање на корисниците, односно за преземање и користење на нивните лични податоци. „Тикток“ постојано ги отфрла овие обвинувања.