21-годишно момче денеска им се заканувало и се обидело да нападне новинарка и снимател на телевизијата „Прва“, кои дошле на популарната плажа Ада Циганлија за да снимаат прилог за прославата на Први мај, јавија локалните медиуми.

Младиот насилник Н.Ј е уапсен. Тој е осомничен дека „при снимањето на прилог од страна на новинарската екипа, пришол и сакал да го прободе снимателот со вилушка за скара“, соопшти полицијата.

По инцидентот на младиот напаѓач му е одреден притвор до 48 часа и ќе биде изведен во Второто основно јавно обвинителство во Белград. Против него е поднесена кривична пријава засторено кривично дело насилничко однесување.

Претходно денеска, пак, на улицата „Првомајска“ во Земун, друг насилник ја нападнал новинарската екипа на јавниот сервис РТС, навредувајќи и заканувајќи им се на новинарот и на снимателот. Полицијата трага по напаѓачот.