Четиринаесетгодишно момче од Загреб завршило во болница со тешки повреди откако запалило петарда која му експлодирала во рака, известуваат од порталот ТВ „Хрватска Нова“.

Хрватската полиција соопшти дека малолетникот петардата ја нашол на улица.

„Детето се здобило со тешки физички повреди.  Се работи за повреда на десното око со губење на видот, добило и повеќе изгореници на лицето и на двете раце, како и повеќекратни скршеници на левата рака“, изјави Марио Куртањек, детски хирург во Загреб.

Овие трагични случаи се причината поради која петарди од секаков вид се забранети во последните три години во Хрватска.

Хрватското Министерство за внатрешни работи ги повика родителите, но и другите граѓани, да не купуваат пиротехнички средства за деца кои не се соодветни за нивната возраст и да ги предупредат на опасностите од нивното користење.