Во кинескиот град Чангша, главен град на покраината Хунан, евидентиран е вознемирувачки случај кој повторно го привлече вниманието кон притисокот на кој се изложени учениците.

Неименуваниот 11-годишник завршил во болница откако учел и пишувал домашни задачи 14 часа без пауза – од осум часот наутро до десет часот навечер, објавува „Одити централ“.

Што се случило?

Доцна навечер, момчето одеднаш имало проблем со здравјето – се вознемирило, почнало брзо да дише, се пожалило на вртоглавица, главоболка и вкочанетост во рацете и нозете.

Во паника, неговите родители го однеле во болница, каде што лекарите препознале респираторни проблеми и симптоми на хипервентилација.

Медицинските експерти објасниле дека оваа состојба е резултат на пребрзо и предлабоко дишење, предизвикано од емоционален стрес и притисок. Симптомите вклучуваат стегање во градите, вртоглавица, слабост и вкочанетост на екстремитетите, а во потешки случаи може да има вкочанетост на мускулите или грчеви во прстите.

Не е изолиран случај

Централната болница во градот Чангша наведува дека ова не е изолиран случај. Само во август, службата за итни случаи за деца примила повеќе од 30 малолетници со слични симптоми, што е десеткратно зголемување во споредба со претходните месеци.

Како главни причини се наведуваат прекумерното учење, стресот поради испити и долготрајната употреба на мобилни телефони.