По неочекуваниот пораз од Кремонезе на стартот на Серија А, Милан конечно вчера ја запиша првата сезонска победа, совладувајќи го Лече со 2:0 во второто коло. Ова беше прва првенствена победа за Масимилијано Алегри по неговото враќање на клупата на „росонерите“, како и прва победа за Лука Модриќ во дресот на Милан, каде пристигна летово.

Тренерот на Милан, Алегри, по средбата на стадионот „Виа дел Маре“, не го криеше задоволството.

„Екипата остана концентрирана 95 минути и покрај тоа што ни беа поништени два гола. Имаше моменти кога можевме подобро, но ова е само почеток. Ова е прв вистински чекор во сезоната“, изјави Алегри за „ДАЗН“, а потоа со посебни зборови го пофали хрватскиот ветеран.

„Со Модриќ на теренот, сè е полесно. Тој е шампион, но и неверојатен човек. Во првото полувреме игравме повеќе со долги топки, а во второто внесовме варијации. Победата беше заслужена, Лече беше добар противник, но ние направивме чекор напред, не само затоа што не примивме гол, туку и затоа што се подобривме во многу сегменти“, дополни Алегри.

Лука Модриќ ги одигра сите 90 минути и запиша асистенција за водечкиот погодок. Во 66. минута од слободен удар испрати прецизен центаршут до Рубен Лофтус-Чик, кој со удар со глава го отвори резултатот. Со тоа, Модриќ стана највозрасниот фудбалер што асистирал на натпревар од Серија А во последните 20 години на возраст од 39 години и 354 дена.

Конечниот резултат го постави Кристијан Пулишиќ со гол во 86. минута, за комплетна радост во таборот на Милан.

ВИДЕО | Милан го победи Лече на гостински терен во Серија А