„Инсулинот е измислен 101 година, а ние во Македонија, во 21 век не можеме да го аплицираме, затоа што немаме игли. Ако немаме игли, тогаш исто ни е како да немаме инсулин. Знаете ли колкави модрици ни се прават од тоа што една игла наместо до 4 боцкања, ние ја користиме 4 недели иако е максимално отапена?“, изјави за „Слободен печат“ претседателот на Сојузот на здруженија на дијабетичарите Димче Велев.

Утре во 19 часот пред Министерството за здравство дијабетичарите излегуваат на најавениот протест, откако Министерството за здравство не го исполни ветувањето дека до 20-ти јули ќе им бидат набавени неопходните ленти, игли, глукомери и антидијабетна терапија кои фалат со месеци поради тендерот. Ветувањето, според Велев, им го дал лично министерот за здравство Фатмир Меџити, ама не го исполнил.

–Имаат проблем во Министерството во системот и нас не не интересира тоа, тој проблем треба да си го реши Министерството. До денес требаше да донесат антидијабетна терапија. Нема игли за аплицирање на инсулинот. Нема ленти и глукомери. Ништо нема освен инсулин. „Оземпик“ има само за некои пациенти и тоа пола. Министерството за здравство ништо не исполни од тоа што ветија. Проблемот трае осум месеци. Нашите барања се референтна цена за глукомери, сензори и ленти. За сите пациенти со дијабетес тип 1 бараме бесплатни сензори, а за другите да има референтна цена. Тоа значи сами да си одиме во аптека и на товар на Фондот за здравство да си купуваме глукомери и ленти. Сега кога има недостиг на сите овие работи, меѓу себе си помагаме и две компании ни дадоа донации од 30 сензори и 400 апарати кои отидоа кај луѓе со најголеми компликации и коморбидитети. Ама и меѓу себе веќе нема да може да си помагаме, бидејќи во аптеките почнува да снемува ленти и игли за аплицирање инсулин. Очекувам дека ќе се појават за некое време и тоа многу поскапи, изјави Велев за „Слободен печат“.

Тој додава дека за децата со дијабетес тип 1 нема сетови за пумпи.

– Не можат да сменат пумпа и да стават нов инсулин. Ќе бараме одговорност од Министерството. Државата да си го смени системот. Не можеме веќе вака. Пенкалото мене ништо не ми вреди ако не можам да го употребувам. Имаме најсовремена терапија а не може да ја користиме. Тоа што со една игла се боцкаме по месец дена, нас не обезличува, а тие мака немаат, си тераат тендери процедури и правила и не го менуваат системот. А ние му кажуваме на Министерството за здравство, дека Европската Унија, цел свет работи со референтни цени. Ама таму нема корупција и земање проценти. Последен пат кога го видовме Меџити рече дека не знае зошто не се распишал тендерот на време. Го прашавме кога е последниот ден да стигнат препаратите рекоа 20-ти јули. На 20-ти немаме ништо. И тоа што го имаше малку, го снема, додаде Велев.

Во земјава има 150 илјади дијабетичари од кои 45 илјади се корисници на инсулинска терапија. Дијабетичарите се жалат дека иако на хартија стои дека добиваат најсовремена антидијабетна терапија, сепак не ја добиваат односно не се доставува до инсулинските аптеки за сите.

„Им поминаа и на администрацијата и на одговорните сите рокови. Дојде време да си го земеме она што по Устав, Закон и буџет ни следува! Ве покануваме на 21 јули во 19 часот пред зградата на Министерството за здравство, на предупредувачки мирен протест. На овој протест повикуваме на достоинствено однесување, без насилство и без нарушување на јавниот ред и мир. Ова е протест на лицата со дијабетес и се оградуваме од какви било други ознаки, присвојувања и обид за негова инволвираност во меѓупартиски, политички и други пресметки. Сите ќе не почитувате, ако не поддржите во нашите барања“, напишаа организаторите во својата покана.

До Министерството за здравство „Слободен печат“ упати прашања поврзани со енормните дефицити за дијабетна терапија, ленти, глукомери и сензори.

„Министерството за здравство има целосно разбирање за пациентите со дијабет. Затоа правиме се во наша моќ што побрзо се завршат правните процедури кои како институција мора да ги почитуваме. Како што веќе во неколку наврати информиравме, во моментов течат жалбените постапки на набавката на ленти, процедура која не зависи од министерството. Сите процедури во рамки на Министерството за здравство се завршени во најкраток рок. Жалиме што набавката доцнела која требала да се започне уште во декември од претходното раководство. Што се однесува до набавката за сензори, таа е во фаза на евалуација и се очекува набрзо да заврши. Сите деца со дијабет, како и бремените и слепите лица за прв пат ќе добијат вакви сензори. Бараме разбирање од пациентите за оваа состојба која брзо ќе биде надмината. Министерот Меџити по преземање на функцијата се заложи ваквите застои во набавките повеќе никогаш да не бидат случај“, велат од Министерството во одговор за „Слободен печат“.