50,4 отсто од испитаниците во ново истражување спроведено од германската конзервативна Фондација „Конрад Аденауер“ во земјава, сметаат дека руската воена агресија врз Украина е неоправдана и неприфатлива, додека речиси двојно помал дел – 26,2 отсто сметаат дека е оправдана и прифатлива.

Според истражувањето, спроведено за потребите на публикацијата „30 години надворешна политика и одбрана“, 65,7 отсто од испитаниците го поддржуваат проектот „Отворен Балкан“, додека 15 отсто не ја поддржуваат иницијативата за поблиска соработка меѓу Македонија, Албанија и Србија.

57,1 проценти од испитаниците се изјасниле против таканаречениот „француски предлог“, со кој се тргна бугарското вето и се отворија преговорите со ЕУ. Предлогот го прифаќаат 27,2 проценти од граѓаните кои учествувале во истражувањето.

Бугарија за најголем непријател на Македонија ја сметаат 44 отсто од испитаниците, а на второто место по негативниот впечаток кај граѓаните е Русија. Најголем дел од испитаниците (37,6 отсто) одговориле дека ја гледаат Србија како најголем сојузник на земјава.

64,2 отсто од испитаниците го поддржуваат членството на Македонија во НАТО, а 56,2 отсто сметаат дека со зачленувањето во Алијансата, Македонија е побезбедна и постабилна, покажува истражувањето. Членството на Македонија во ЕУ има поддршка од 63,8 отсто од испитаните граѓани.