Здружението Македонски национален комитет на Меѓународниот совет на музеите (МНК ИКОМ), во рамките на своите активности од 1994 година до сега, а по повод одбележување на 18 Мај – Меѓународниот ден на музеите, организира годишни Советувања во согласност со предложени теми на Меѓународниот комитет на музеите – ИКОМ.

Согласно ваквата востановена пракса на МНК ИКОМ, оваа година советувањето е на тема „Моќта на музеите“ и се одржува во НУ Музеј на Република Северна Македонија, на 18 мај 2022 година.

Советувањето е поддржано од Министерството за култура на Република Северна Македонија, во рамките на Годишната програма за финансирање на проекти од национален интерес во културата за 2022 година, а на отворањето на советувањето присуствуваше и министерката за култура Бисера Костадиновска Стојчевска.

На Советувањето на тема „Моќта на музеите“, кое е во организација на МНК ИКОМ, присуствуваат голем број музејски професионалци од земјава, а по четиринаесетти пат се доделени и традиционалните награди „18 Мај – Меѓународен ден на музеите“ за особени достигнувања во музејската дејност за 2021 година. Доделувањето на наградите е поттик за музеите и за музејските работници за понатамошната работа и ангажирање, со цел постигнување на највисоките стандарди на квалитет во музејската дејност.

Добитници на наградите „18 Мај – Меѓународен ден на музеите“ за особени достигнувања во музејската дејност за 2021 година се следните:

– Награда во категоријата Музеј на годината – ЈУ Музеј на град Скопје

– Награда во категоријата Музејски проект на годината – НУ Национална галерија на Република Северна Македонија, за проектот „Димче Коцо – Јубилеј 110 години од раѓање“

– Награда во категоријата Музејски работник на годината на Јасминка Намичева, кустос советник од ЈУ Музеј на град Скопје

– Награда во категоријата Надворешен музејски соработник на УМНО.мк

– Награда во категоријата Надворешен музејски соработник на Бојана Јанева за проектот „Најново нормално“

Добитници на пофалница во категоријата Музеј на годината – НУ Музеј на современата уметност – Скопје; во категоријата Музејски проект на годината – Музејот на Народната банка за проектот „Видеобелешки на Музејот на Народната банка“; и во категоријата Музејски проект на годината – Славица Крстиќ за проектот „Цркви и манастири во Жеглигово“.

Пред почетокот на советувањето беше отворена изложбата под наслов „Гозби за живите, претците, боговите и светците“, организирана од страна на НУ Музеј на Република Северна Македонија, како и одбележување на јубилејот 20 години Македонски национален комитет на „Синиот штит“, известија од МНК ИКОМ.