Меѓународниот монетарен фонд (ММФ) смета дека е неопходно Соединетите Американски Држави да го намалат буџетскиот дефицит и да го решат проблемот со постојано растечкиот национален долг, изјави заменик-директорката на ММФ, Гита Гопинат.

„Вашингтон треба да води фискална политика што има за цел постепено да го намалува јавниот долг во однос на БДП“, изјави Гопинат за „Фајненшл тајмс“.

Таа додаде дека американската економија страда од „многу висока“ неизвесност околу трговската политика и покрај неодамнешниот привремен договор со Кина, објави Ројтерс.

Прогнозите на ММФ објавени минатиот месец покажуваат дека буџетскиот дефицит на САД ќе се намали оваа година благодарение на зголемените приходи од царина, но тие не го земаат предвид потенцијалното влијание на новиот закон за намалување на даноците што би можел дополнително да го зголеми долгот.

-Растечкиот буџетски дефицит значи дека САД ќе бидат принудени да издаваат повеќе државни обврзници во време кога странските и домашните инвеститори почнаа да ја доведуваат во прашање стабилноста на американските пазари – забележува „Фајненшл тајмс“.

Во април, ММФ ја намали својата прогноза за раст на БДП на САД за 2025 година за 0,9 процентни поени на 1,8 проценти, а својата прогноза за раст на глобалната економија за 0,5 процентни поени на 2,8 проценти.