Светската економија ќе расте со стабилно темпо оваа и следната година, со забавување на активноста во САД и знаци на закрепнување во Европа, проценува Меѓународниот монетарен фонд (ММФ), благо подигајќи ја прогнозата за раст во еврозоната.

Светската економија годинава ќе порасне за 3,2 отсто, ММФ ја потврди пролетната прогноза, што е речиси со исто темпо како лани. Растот треба да остане блиску до тоа ниво и во 2025 година, со прогнозирана стапка на раст од 3,3 отсто, за 0,1 процентен поен повисока од очекувањата на ММФ во април. Американската економија и оваа година би требало да расте со речиси исто темпо како и минатата година, според прогнозираната стапка од 2,6 отсто, што е за 0,1 процентен поен пониско од она што ММФ го прогнозираше во редовните пролетни прогнози. Во 2025 година, активноста во најголемата светска економија би требало значително да забави, со прогнозирана стапка на раст од 1,9 отсто, поради послабата побарувачка за работна сила и умерената потрошувачка во услови на високи трошоци за задолжување.

ММФ во својот летен извештај објавува само прогнози за големите економии и региони. Се чини дека еврозоната ја достигна најниската точка и треба да закрепне оваа година, по стагнацијата во 2023 година, проценува ММФ, зголемувајќи ја проценката за раст на активноста за 0,1 процентен поен, на 0,9 отсто.

Растот во услужниот сектор забрза во првата половина од годината, а нето-извозот се зголеми посилно од очекуваното, забележуваат тие. Во 2025 година, растот треба да се забрза до 1,5 отсто бидејќи повисоките реални плати ќе ја поддржат личната потрошувачка и омекнатата монетарна политика на инвестиции, објави Хина.

Ризикот од забрзан раст на цените го носат и трговските и геополитичките тензии, кои би ги зголемиле трошоците на увезените стоки низ синџирот на снабдување. Поради овој ризик, централните банки би можеле да ги задржат каматните стапки на повисоко ниво подолго отколку што планирале, што би резултирало со зголемени надворешни, фискални и финансиски ризици, заклучува ММФ.