Младата фудбалска репрезентација на Македонија до 21 година доживеа минимален пораз од селекцијата на Франција во квалификациите за Европското првенство кое ќе се одржи 2023 година.

Фаворизираните Французи до победата дојдоа потешко од очекувањата и тоа со подарокот кој го добија по лошата реакција на дефанзивецот Јован Манев. Младиот фудбалер на Брегалница во 75. минута „му асистираше“ на Калулу кој го постигна единствениот гол на натпреварот.

Избраниците на селекторот Канатларовски имаа свои шанси во првото полувреме, посебно преку Илиевски, но неговиот удар го одбрани Меслие.

Во вториот дел, Французите напаѓаа, но тешко доаѓаа до шанси иако во неколку навати голманот Илиевски одлично интервенираше по ударите на Шерки и на Муинга.

По шест натпревари, Македонија има шест бода за трето место на табелата, додека Франција е лидер на табелата со 16 бодови, три повеќе од Украина.

Во наредното коло, Македонија на 22 март идната година и гостува на Србија која денеска загуби со 2:1 од Украина и ги загуби шансите за второто место.