Владината портпаролка Марија Митева вечерва во „Само вистина“ на „Канал 5“ рече дека 2% доверба на граѓаните во правосудството е клучен показател дека реформите во оваа сфера се неопходни. Таа тврди дека владеењето на правото и борбата против криминалот и корупцијата се приоритети на Владата, а реформите „не се политичка игра“ и се од големо значење за правосудството. Митева рече и дека Владата ќе продолжи да бара одговорност, со посветеност на спроведување на правдата и примена на законски измени, при што „компромиси нема да има“.

„Континуирано зборуваме дека исклучително ни е важно, како држава владеењето на правото и борбата со криминалот и корупцијата а тоа се надлежните институции кои што треба тоа да го спроведуваат“, вели Митева.

Таа рече дека реформите во правосудството се неопходни и дека не станува збор за политички поени, туку суштинска потреба. Таа додаде дека многумина може да ја обвинуваат власта и да тврдат дека реформите се притисок од власта, меѓутоа тие можеби се оние кои имаат интерес од статусот-кво.

„Кога имаме едни вакви примери и како низа други, за жал само ни потврдуваат дека реформи во правосудството се неопходни. Не е тоа политика која ние на дневна база треба да ја користиме, за било какви политички поени и тоа сме го говореле и од аспект на опозиција го говориме и сега. Изминатиов период, ние како власт, и како владејачко мнозинството во рамките на парламентот започнавме иницијативи. Многумина не обвинуваа, многумина велеа дека тоа е еден притисок кој што го врши власта, но од друга страна јас не можам да се согласам со таквите констатации, јас ценам дека таквите констатации доаѓаат од луѓето на кои што можеби ваквата статус кво состојба им одговара во правосудството“, рече владината портпаролка.