Луѓето кои јадат лути пиперки може да имаат „значително помал ризик да умрат од кардиоваскуларни болести или рак“, стои во резултатите од студијата што треба да се претстави на научниот собир на Американското здравствено здружение за срцеви заболувања.

Врз основа на претходни истражувања, утврдено е дека лутите пиперки имаат антиинфламаторно дејство, тие се антиоксиданти, имаат антиканцерогено дејство и го регулираат нивото на шеќер во крвта. Сето тоа поради каписаицин – состојка што на пиперките им го дава карактеристичниот „топол“ вкус.

Оваа студија е прв голем обид да се воспостави врска помеѓу употребата на лути пиперки во исхраната и стапката на смртност од разни болести.

За да се проценат ефектите на лутите пиперки врз „долговечноста“, истражувачите анализирале 4.729 студии од пет водечки бази на податоци за здравјето во светот. Тие вклучиле четири обемни студии кои ги следат здравствените резултати на пациентите за кои воедно имале податоци за начинот на исхрана. Тоа на истражувачкиот тим им обезбедило податоци за здравјето и исхраната за повеќе од 570.000 лица во Америка, Италија, Кина и Иран, што им овозможило да ги споредат резултатите од оние кои јаделе лути пиперки со оние кои ретко или никогаш не јаделе луто.

Во споредба со оние кои „ретко “ или „никогаш“ не јаделе лути пиперки, анализата покажала дека луѓето кои ги јадат редовно имаат 26% пониска стапка на смртност од кардиоваскуларни заболувања, 25% помала смртност од рак и 25% помалку смртност од која било друга причина.

„Бевме изненадени кога откривме дека овие претходно објавени студии ја потврдија врската помеѓу редовната консумација на лути пиперки и пониската стапка на смртност“, изјави кардиологот Бо Ксу од Институтот за кардиологија во Кливленд и еден од главните водачи на ова истражување.

Сепак, истражувачите предупредуваат дека точните причини и механизми што би можеле да ги објаснат овие заклучоци сè уште не се познати.

„Затоа е невозможно да се каже со сигурност дека ако јадете повеќе лути пиперки, ќе живеете подолго или ќе бидете помалку загрозени од кардиоваскуларни болести или рак“, велат истражувачите.

Неопходно е да се спроведат дополнителни истражувања, бидејќи студиите што ги анализирале имале примерок кој веќе имал специфични здравствени податоци и други параметри кои можеби влијаеле на конечните резултати.

Истражувачите исто така забележале дека количината и видот на лути пиперки што се користат во исхраната варира во студиите, што дополнително го отежнува извлекувањето заклучоци за тоа колку точно, колку често и кој вид лута пиперка може да биде „директно“ поврзан со здравствени придобивки.