Миротиќ објави: Не доаѓам во Партизан, добивав закани и навреди
Поранешниот шпански репрезентативец Никола Миротиќ преку социјалните мрежи ја информираше јавноста дека кариерата нема да ја продолжи во Србија. По раскинувањето на договорот со Барселона, Миротиќ беше слободен да избере нова средина, а медиумите со денови шпекулираа за негово враќање во Партизан.
Препорачано
Миротиќ на Инстаграм се заблагодари на довербата на Партизан, но најави дека нема да го засили клубот од Србија поради заканите и навредите кои ги добивал, а кои го изненадиле. Поранешниот шпански репрезентативец додаде дека заканите не дошле од таборот на Црвена звезда.
– Почитувани, целиот мој живот го посветив на потрагата по вистината и фер однос кон сите и сè. Тоа е трнлив пат кој бара посветеност, исто како што и дадов голем дел од мојот живот на кошарката обидувајќи се да бидам добар во неа и секогаш играм како дел од тимот. Навистина, кошарката стана дел од мојот живот, но како игра, како желба постојано да се подобрувам и да се победувам себеси. Така едното влијае на другото, развојот на кошарката како игра и развојот и растот на мојата личност – напиша Миротиќ на Инстаграм.
Покрај Партизан, медиумите претходно шпекулираа дека за Миротиќ се заинтересирани Олимпијакос, Олимпија од Милано и Монако, но во меѓувреме тие клубови се повлекоа од трката за неговиот потпис, па како заинтересиран клуб остана само Панатинаикос.
Тој порача дека сака да игра кошарка и се радува на својата игра, како и дека неговото семејство ја дели оваа радост.
– Меѓутоа, веќе со недели излегуваат најразлични информации за мене и за продолжувањето на мојата кариера. Против моја волја и без мое знаење, а секако далеку од вистината, се објавуваат случајно напишани текстови. Некои од нив беа имагинации и произволни заклучоци на поединци и медиуми и сето тоа предизвика големо внимание, што јас и моето семејство не го сакавме. Во јавноста стигнаа одредени информации за натамошното продолжување на кариерата во Партизан, почнаа заканите и навредите кои многу ме изненадија и ме повредија, бидејќи не сакам да бидам личност која ќе ги дели луѓето по која било основа, а камоли по боите на клубот. Решив да не бидам дел од таква атмосфера и дека не сакам да се изложувам себеси или моето семејство на дополнителни непријатности – стои во дел од објавата на Миротиќ.
