Намален е за, речиси, пола бројот на хоспитализирани пациенти во четирите ковид-оддели во Општата болница „Борка Талески” во Прилеп, но не се препорачува опуштање, бидејќи треба да се видат последиците од новогодишните и божикните празнувања, порачуваат од таа јавна здравствена установа.

Иако за речиси пола е намален бројот на хоспитализирани пациенти, а за една третина на амбулантските прегледи, сепак не треба да се размислува за опуштање. Инфектологот Мирјана Крстеска, раководител на Инфективното одделение при болницата, смета дека допрва ќе се видат последиците од празнувањата, кој колку се придржувал. Над 70 отсто од пациентите на одделенијата во ковид-центрите добиваат кислородна поддршка и тоа воглавно се повозрасни лица.

– И денеска имаме нови хоспитализации. Колку што испишуваме, толку и хоспитализираме. Бројката ни стои на исто ниво. Обично хоспитализираме повозрасни пациенти, со повеќе коморбидитети. Во инфективното одделение речиси сите 28 пациенти се на кислородна поддршка, постојана и повремена. И сите се повозрасни пациенти. Епидемиолошката слика зависи колку граѓаните се придржувале на мерките за празниците. Ако добро се придржувале, бројката ќе остане ваква каква што е. Но, сметам дека ќе имаме мало зголемување по 14-ина дена, вели инфектологот Крстеска.

Според неа, се соочуваат со нова ситуација – пост-ковид проблеми кај пациенти кои прележале коронавирус. Посочи дека неопходна е помошта на интернистите.

– Постојано доаѓаат пациенти кои подолго време се позитивни, па имаат некакви компликации, па бараат контроли, повторни прегледи. Честопати се случува и по прележан ковид да имаат тешкотии, проблеми со дишењето, па ги праќаме на интерното одделение. Се консултираме со интернистите. Тие што прележале, најчесто се жалаат на проблеми со дишењето, со пониска сатурација, и покрај тоа што поминало лекувањето, се излекувани, но сепак имаат проблеми и тегоби. Затоа, мора да се консултираме и со интернистите, како пост-ковид компликации, на некој начин, вели инфектологот Крстеска.