Македонскиот репрезентативец Бојан Миовски и официјално е нов фудбалер на шкотскиот гигант Ренџерс. Напаѓачот денеска стави потпис на четиригодишен договор и стана 11-то засилување на клубот во текот на летниот преоден рок.

Миовски зад себе има одлични две сезони во Шкотска во дресот на Абердин (2022–2024), каде постигна вкупно 44 гола и со своите настапи во североисточниот дел на земјата привлече внимание од повисоко ниво. По заминувањето од Абердин, минатата сезона ја мина во шпанска Џирона каде запиша 21 настап.

„Навистина сум возбуден што станувам дел од Ренџерс и што го правам следниот чекор во мојата кариера. Ова е голем клуб со неверојатна историја и вистинска чест е што ќе бидам дел од него. Во моментот кога слушнав за интересот, веднаш знаев дека сакам да бидам тука. Едвај чекам да почнам, да ги запознаам новите соиграчи и да играм пред нашите навивачи“, изјави Миовски

Шефот на стручниот штаб, Расел Мартин, истакна:

„Пресреќни сме што го донесовме Бојан во Ренџерс. Неговото движење, интелигенција и способноста да постигнува голови го прават вистински адут во нашиот напад. Тој добро го познава шкотскиот шампионат и има одличен учинок, па со задоволство го пречекуваме во нашата екипа.“