Министерот за здравство Фатмир Меџити за „Слободен печат“ вели дека ќе ја потпише препораката на Комисијата за заразни болести да се прогласи епидемија на магарешка кашлица во Скопје. Со тоа ќе стапат во сила препораките според кои децата што имаат пропуштени вакцини, нема да бидат примани во градинките. Во моментот во државата има 18 случаи на магарешка кашлица, од кои 16 се во Скопје. Болеста трае 100 дена и е особено тешка за бебињата и малите деца.

-Се одлучивме да препорачаме прогласување на епидемија за град Скопје. Ова звучи малку страшно „епидемија“, но реално треба да ни олесни во справувањето со ризикот кој доаѓа со болеста голема кашлица. Го подготвуваме Упатството за постапување во услови на епидемија што го спрема ИЈЗ и клучните активности се да се надополнат пропуштените дози вакцини. Опфатот на вакцинација со пертусис не е на задоволително ниво. Ќе ги повикуваме сите што ја пропуштиле вакцинацијата, ќе предложиме вакциналните пунктови да работат во 2 смени и во сабота. Препорачуваме забрана за прием на невакцинирани деца во градинки. Оваа болест е најтешка за најмалите, рече претседателот на комисијата за заразни болести професор доктор Александар Петличковски.