Министерот за надворешни работи и надворешна трговија, Тимчо Муцунски оствари средба со амбасадорката на Грција, Софија Филипиду.

На средбата, Муцунски изрази уверување дека земјава е силно посветена на натамошно унапредување на билатералната, регионалната и мултилатералната соработка со Грција, пред сѐ како НАТО партнери и сојузници.

-Наш интерес е градење добрососедски односи во функција на безбедност, стабилност и просперитет на Регионот. Земјава останува определена кон натамошно унапредување на билатералните односи, преку отворен дијалог за сите прашања од заемен интерес, а во функција на нејзино збогатување со нови содржини и во полза на просперитетот и благосостојбата на граѓаните од двете земји, нагласи Муцунски на средбата.

Соговорниците, според соопштението на МНРНТ, го реафирмираа интересот за интензивирање на економската соработка, дотолку повеќе што Грција е меѓу петте земји со кои Република Северна Македонија оствари најголем обем на трговска размена во изминатата година.

-На средбата изразив уверување дека остануваме силно посветени на натамошното унапредување на билатералната, регионалната и мултилатералната соработка, пред се како партнери и сојузници во НАТО алијансата. Истакнав дека нашиот интерес е градење добрососедски односи кои се пред се во функција на просперитетот, безбедноста и стабилноста на регионот, а во таа насока потенцирав дека остануваме отворени за дијалог за унапредување на билатералните односи и сите прашања од заеднички интерес, напиша Муцунски на Фејсбук.

Грчката амбасадорка Филипиду на инагурацијата на претседателката Гордана Сиљановска Давкова која се одржа на 12 мај, демонстративно ја напушти собраниската галерија откако наместо уставното име, Сиљаноска во заклетвата изговори само „Македонија“ по што дојде до заладување на македонско – грчките односи и инсистирање од грчка страна и од Европската Унија и САД македонските власти да го почитуваат Договорот од Преспа и да го користат ерга омнес уставното име.