Министерот за земјоделство, шумарство и водостопанство Цветан Трипуновски само што седна во министерската фотелја, побара да се прекине огласот за вработување на неопределено време за четириесетина службеници во Министерството. Дел од нив во редакцијата на „Слободен печат“ алармираат дека се исплашени дека ќе се случи чистка односно дека ќе ги загубат работните места по истекот на договорот што им важи уште неколку месеци. На дел од кандидатите кои се обратија во нашата редакција, им останала само уште фазата да го поминат интервјуто откако се пријавиле на огласот.

Во врска со доставеното прашање дали е точно дека министерот Цветан Трипуновски испратил допис до Агенцијата за вработување со кој се бара да се прекине огласот за вработување на неопределено време за четириесетина службеници во Министерството, Ве известуваме дека министерот достави барање до Агенцијата за вработување со кое Министерството за земјоделство, шумарство и водостопанство бара да се запре постапката за вработување по Јавниот оглас број 756/2023, одговорија од Министерството на прашањата на „Слободен печат“.

Оттаму додаваат дека „горенаведениот оглас е објавен на втори јануари 2024 година непосредно пред формирањето на техничката влада, како би се избегнал потписот на дополнителниот заменик министер со што се отвора сомнеж за манипулација на постапката пред одржување на избори“.

Воедно, Ве известуваме дека на Јавен оглас за вработување на неопределено време може да аплицира секој кој ги исполнува пропишаните услови, а не само оние кои се вработени на определено време.

На вработените на определено време работниот однос им е регулиран со Решение за вработување на определено време и доколку ги извршуваат работните задачи согласно описот на работното место нема причина од стравување од прекинување на работниот однос, вели министерот Трипуновски за „Слободен печат“.