Претседателот на Демократските сили на Ромите (ДСР) и министер без ресор, Шабан Салиу, синоќа ја промовираше својата кандидатура за градоначалник на општина Шуто Оризари.

– Шуто Оризари е единствената општина во светот водена од ромска заедница, место каде секој камен шепоти приказни за нашата историја, култура и непокорен дух. Денес носиме заедничка одлука за нашата иднина – за чесен, ефикасен и емотивен начин на управување со нашата општина. Оваа визија не е само моја – таа е и ваша. Со заеднички напор, со доверба и љубов кон нашата општина, ние ќе го направиме Шуто Оризари светол пример во Македонија и пошироко – порача Салиу.

Во своето обраќање, тој ја претстави својата политичка визија и програма за модерна, функционална и достоинствена општина.

Салиу најави дека приоритет ќе биде изградба на инфраструктура која ќе донесе квалитетен живот за сите жители, како што се асфалтирани улици до секој дом, проширен водовод и канализација, ЛЕД осветлување и безбедни пешачки патеки, како и нови социјални станови за семејствата што долго чекаат покрив над глава.