Категорично ги отфрлам скандалозните тврдења на Арсовска дека сум знаела за пожарот, а не сум пријавила. Веста за пожарот многу брзо се ширеше по социјалните медиуми од каде дознав и јас, по што веднаш се упатив кон Универзална сала, истакна на денешната прес конференција министерката за култура Бисера Костадиновска Стојчевска која најави дека изнесените обвинувања градоначалничката Данела Арсовска ќе мора да ги докаже на суд.

Инсинуирањето на Арсовска дека сум знаела за пожарот и не сум пријавила, низата небулози искажани на вчерашниот прес во следните денови ќе бидат предмет на судските инстанци, па самата таа ќе има можност подетално да објасни за изнесените тврдења за мене, поврзани со Универзална сала – рече министерката.

Во врска со обвинувањата за упадот во системот на јавни набавки, Костадиновска Стојчевска нагласи дека тоа било карактеристика за едно друго време во која градот и државата ја воделе оние кои ја направиле Арсовска градоначалник, ВМРО-ДПМНЕ.

Во наше време има уредно пратено барање до Биро за јавни набавки и уредно добиен одговор за промена на инвеститор како што налага договорот склучен со Град Скопје. Нема упад, има само уште една лага од Арсовска. Симптоматично е како за Арсовска проектот стана небезбеден кога досега потпишала неколку документи за почеток на негова реализација. Истиот тој проект кој таа го спори и тврди дека е фалсификат беше изваден од системот за добивање градежна дозвола за пресметка на комуналии. Градот изготви таква пресметка, а Министерството ја плати – посочи министерката за култура, додавајќи дека биле платени 146 000 денари за комуналии.

Како што кажа Костадиновска Стојчевска, градоначалничката е потпишана на договорот за регулирање на постапка, но и на решението за реконструкција, со што ја потврдува безбедноста н апроектот. Истите чекори морало да ги помине и Министерството затоа што било истечено одобрението за реконструкција.

Костадиновска Стојчевска: Универзална сала ќе продолжи да се гради, објектот е осигуран

Министерката смета дека со вчерашниот прес на скопската градоначалничка, кој според неа е само политиканство пред парламентарните избори, Арсовска се обидува да ја скрие сопствената неспособност за реконструкција на салата.

Не само што две години не презеде ништо и ја остави да пропаѓа и рѓосува салата, Арсовска дополнително го оштети буџетот со 20 милиони денари, пари на граѓаните, заради нејзин личен хир и желба да не се изгради. Арсовска поради одлагањето на реконструкцијата изгуби судски спор и го оштети буџетот на граѓаните наменет за реконструкција – истакна министерката.

Таа потсети дека документите поврзани со реконструкцијата на Универзална сала морале да ги обезбедат по службена должност затоа што Арсовска не ги предавала и како што рече, проектот кој таа го оспорува има добиено позитивни мислења од сите институции и ревиденти, вклучително и од ИЗЗИС, а притоа сите тие мислења биле прибавени од Град Скопје, а не од Министерството за култура. Министерката нагласи дека никаде во документацијата нема документ дека ИЗЗИС тоа мислење го поништил.

Вчера до Министерството за култура градоначалничката испратила барање за раскинување на договорот за реконструкција.

 Таа треба да знае дека сите одлуки ги носи Советот, а не таа лично и затоа нејзиното барање кое вчера пристигна во Министерството за раскинување на договорот за реконструкција не може да има никакво правно дејство затоа што истото треба да биде донесено од Советот. Доколку Советот одлучи да го раскине договорот, тогаш Градот ќе мора да ги врати сите средства кои досега сме ги вложиле, а се сомневам дека во овој момент Градот има капацитет за тоа – нагласи Костадиновска Стојчевска.

Според неа,  реконструкцијата на Универзална сала ќе продолжи  и таа ќе биде готова во предвидениот рок.

Вчера на прес конференција, градоначалничката обвини за упад во системот за јавни набавки на Биро за јавни набавки и праша по кој член од Законот за јавни набавки, јавна набавка што минатата 2023 година е трајно завршена, реализирана и архивирана, може повторно да се активира како во овој случај во 2024 година, со неовластено пристапување од друга институција во профилот на Град Скопје. Меѓу другото таа праша зошто министерката не го пријавила пожарот ако дознала пред 9 часот, а пожарна била известена еден час подоцна од случаен минувач.