Директорот Гоце Димовски, како дел од владината делегација предводена од министерката за финансии, Гордана Димитриеска Кочоска, заедно со Викторија Трајков, заменик-министерка за европски прашања, денеска присуствуваше на 28-миот Евроазиски економски самит во Истанбул, Турција, организиран од Фондацијата за стратешки и општествени истражувања – „Мармара груп“.

Димовски се обрати на панелот со тема „Екологија, економија, енергија и вештачка интелигенција“ при што посочи дека одржливиот развој не е само избор, туку неопходност.

-Технолошко-индустриските развојни зони во Македонија се поставени како пример за интегрирање на еколошките стандарди во индустрискиот развој. Со фокусирање на лесна, незагадувачка индустрија и модерна логистика, создадовме услови за производство што ги минимизира негативните влијанија врз животната средина и овозможува квалитетен живот за локалните заедници, изјавил Димовски.

Тој ги истакнал фискалните и царински стимулации, даночни ослободувања и поддршката за нови работни места, што директно влијае на привлекувањето најиновативни домашни и странски инвеститори.

-Само преку партнерства, размена на знаење и иновации можеме да изградиме економии кои се отпорни, инклузивни и одржливи. Македонија останува посветена на европските вредности, на зелената транзиција и на дигиталната трансформација – заедно со вас, нашите пријатели и партнери од евроазискиот регион, рекол Димовски.